Жаз мезгілінде, әсіресе, балаларды үйде ұстап отыру қиынның-қиыны. Қыс бойы сабақ оқып, әрі компьютерден көз алмаған балалардың таза ауада ойнағаны, суға шомылып, көк шөпте аунап-қунағандары, денсаулықтарының шымыр болғандары ата-аналары үшін, әрине, жақсы. Десек те, кешке қарай балаларын түгендеуді ұмытып кететін ата-аналар да бізде баршылық екен. Оны аудандық ішкі істер бөлімінің мәліметтерінен көріп, байқағандық. Нақтырақ айтсақ, осы жылдың алты айында кешқұрым, үлкендердің қарауынсыз жүрген балалар мен жасөспірімдер үшін ата-аналарға ҚР әкімшілік құқықбұзушылық туралы Кодексінің 444-бабы 2-ші тармағы бойынша 15 хаттама толтырылған. Осындай құқықбұзушылық фактілері өткен жылмен салыстырғанда биыл 65 пайызды құрап отыр.
Қалай десек те, малды да қараусыз қалдыруға болмайтын бүгінгі уақытта өмірдің гүлі – балаларды және жасөспірімдерді сәл де болса көзден таса қалдыру үлкен қателік дер едім. Балалар амандығына ештеңе жетпесі анық. Жауапкершілікті ұмытпаған жөн, ағайын!
Айсұлу АРЫСТАНОВА
Шыңғырлау ауданы
