8 – Наурыз Халықаралық әйелдер күні мерекесіне орай Сырым ауданы әкімі Абат Шыныбеков ауданның көп балалы аналары және өңірдің қоғамдық – саяси өміріндегі белсенді азаматшалармен салтанатты дастархан басында кездесті. Шара «Тамаша» мейрамханасында өтті.
Әйел – аналарды құттықтаған аудан басшысы Абат Шыныбеков өзінің сөзінде, Алланың асыл жаратылысы, ұлттың жалғаушысы, отбасының ұйытқысы әйел затының адамзаттың өміріндегі алатын маңызына тоқталды. Аты ардақты әйелдер қазақтың тарихында аз емес. Бірі - батыр, бірі -қайраткер. Жанұясында жылулық орнатып, ұрпақтың тәрбиесіне теңдессіз үлес қосқан қазақтың әр әйелін батыр деуге болады. Әкім де осыны айтты.
Салтанатты дастархан басындағы әйел – аналар қауымы өздеріне деген аса бөлек көңілі үшін ауданның басшысына алғыс айтты, елге тыныштық, жұртқа амандық тіледі. Шараның соңында барлық қонақтарға сыйлықтар үлестірілді.
Бауыржан Ширмединұлы
Сырым ауданы