Қала күні қарсаңында пайдалануға берілген «Лесная сказка» бөбекжайының ашылу салтанатына Орал қаласының әкімі Алтай Көлгінов қатысып, құттықтау сөз сөйледі.
Жарты ғасырдан астам уақыт бұрын салынған балабақша «Жұмыспен қамту жол картасы-2020» мемлекеттік бағдарламасы аясында күрделі жөндеуден өтіп, бүлдіршіндерге есігін айқара ашты.
Ағымдағы жылдың 8 мамырында басталған күрделі жөндеу жұмыстарын жүргізген «Алатау Альдан Агро» ЖШС төрт айдың ішінде қос қабатты, жүз орындық сыңғырлаған бөбекжайды пайдалануға берді.
Бүлдіршіндер мұндағы 4 топтың екеуінде қазақ, екеуінде орыс тілінде тәрбиеленетін болады. Сондай-ақ балабақшада «Тілдерді үйрету орталығы», «Өзін-өзі тану кабинеті» жұмыс жасамақ.
Айта кетейік, бөбекжайды күрделі жөндеу жұмыстарына республикалық бюджеттен 60,028 млн. теңге, жергілікті бюджеттен 43 млн. теңге - барлығы 103 млн.теңге бөлініп, игерілген.
Айгүл Ахметова