Батыс Қазақстан облысындағы Тұңғыш Президент күніне арналған шаралар шеруі «Ел тірегі - Елбасы» атты үлкен мерекелік концертпен айшықталды. Облыстық қазақ драма театрының кең залын лық толтырған көрермендер Ақ Жайық өңірінің ең үздік өнер ұжымдарының сахнадағы шеберлігіне тәнті болды.
Алдымен облыс әкімінің эстрадалық-симфониялық оркестрі, Құрманғазы атындағы саз колледжі және Тасқала ауданының хор ұжымдары бірлесіп еліміздің Әнұранын әуелетті. Одан кейін сырнайдың сүйемелдеуімен сырымдық Амандық Мергенов «Нұр аға» туындысын тамылжыта орындады.
Мерекелік кештің ажарын Ғ. Құрманғалиев атындағы облыстық филармонияның «Назерке» халық биі ансамблі «Шашу», «Менің елім -Достық бесігі» хореографиялық композицияларымен аша түсті.
Теректілік «Жұлдыз» би ансамблінің, М. Өтемісов атындағы БҚМУ-дың «Қорған» және «Інжу» топтарының, «Арман» вокалды тобының тамаша өнеріне де көрермендер тарапынан жоғары баға берілді.
Концертте сондай-ақ жекелеген әншілер, атап айтқанда «Ерен еңбегі үшін» медалінің иегері Жаңылсын Хасанова, республикалық байқаулардың лауреаттары А. Хайырханов пен А. Әжіғалиева, Жастар шығармашылығы орталығының әншісі Д. Сатыбаев, облыстық байқаудың лауреттары, тасқалалық Т. Тапалов пен А. Қахов, Р. Нұрсұлтанова мен А. Оразовтар өз өнерлерін ортаға салды.
Салтанатты кешті Дәулеткерей атындағы қазақ ұлт аспаптар оркестрі (көркемдік жетекшісі және бас дирижері, «Дарын» мемлекеттік жастар сыйлығының лауреаты Еркін Нұрымбетов) күй атасы Құрманғазының әйгілі «Сарыарқа» күйімен аяқтады.
Тоқтар ҒАБДІРЕШҰЛЫ
Суретті түсірген Темірболат ТОҚМАМБЕТОВ
