Облыстық қазақ драма тетрында «КазИИТУ» ғылыми-білім кешені мен Технопарк «Алгоритм» ЖШС қызметкерлерінің ұйымдастыруымен «Еуразиялық – өзен аралығы»: «Өндіріс, ғылым мен білімді біріктіру» атты VI Халықаралық Интеграциялық форумы өтті.
Бұған облыс әкімдігі мен Қазақстан халқы Ассамблеясы облыстық бөлімшесінің басшылығы, жергілікті және ресейлік ғалымдар қатысты. Форум аясында облыстық кәсіпкерлік және индустриялық инновациялық даму басқармасы көрме ұйымдастырып, мұнда «Стекло-Сервис», «Фирма Родник» ЖШС, «Asia Flow Grop», «Аэробот», «Мария ханым» ЖШС мен «Батыс Қазақстан құрылыс материалдары корпорациясы» АҚ, «Текемет» ЖК қызметкерлері өздерінің инновациялық өнімдерін көпшілік назарына ұсынды. Келушілер, әсіресе, Жәңгір хан атындағы БҚАТУ мен«КазИИТУ» ғылыми-білім кешенінің және облыстық балалар техникалық шығармашылығы орталығы өкілдерінің жұмыстарына үлкен қызығушылық танытты.
Жиынды ашқан облыс әкімінің орынбасары Марат Тоғжанов Жайық өңіріне арнайы келген меймандарға «хош келдіңіз» айтып, форум жұмысына сәттілік тіледі.
Форум жұмысының маңыздылығын түсіндіру үшін оқырмандар қаперіне мына бір жәйтті сала кеткеніміз жөн болар. Бұдан 6 жыл бұрын «ҚазИИТУ» кешенінің құрылтайшысы, техника ғылымдарының кандидаты, профессор, академик Ақсерік Әйтімов бастаған ғалымдар тобы «Еуразиялық өзен аралығы» атты халықаралық қоғамдық қозғалыстың өмірге келуіне мұрындық болған еді. Содан бері ҚазИИТУ кешенінде ғарыштық технологиялар мен автоматтандыру және радиоэлектроника мен сала аралық технологиялар бағыты бойынша ғылыми конференциялар мен конгресстер ұйымдастыру ісі дәстүрге айналды. Осындай интеграциялық сипаттағы үрдіс ҚазИИТУ ғалымдарына Кеден одағына кіретін мемлекеттер мен Еуропаның мәртебелі ғылыми орталықтары және инновациялық көрмелеріне қатысуына мүмкіндік берді. Аталған ғылыми - білім кешенінің ұжымы Ресейдегі Пенза мемлекеттік университетімен бірге интеллектуалдық және инновациялық идеялар трансфертін жүзеге асыруда. Бұл жұмыстарды бір жүйеге түсіруде көршілес мемлекеттегі «Дубна» халықаралық табиғат, қоғам және адам университетімен бірлесіп құрылған «Бірқалыпты инновациялық даму» деп аталатын консорциумдық жобаның да ықпалы зор болып отыр. «Еуразиялық өзен аралығы» атты Халықаралық қоғамдық қозғалыс жұмысының нәтижесінде Мәскеу, Дубна, Самара, Тольятти және Орынбор мен Саратов қалаларының жетекші ғалымдары интеллектуалдық байланысқа тартылып, ҚазИИТУ кешенінің ғылыми қызметкерлері олармен іс-тәжірибе алмасуда. Бұл жолғы шараны да осы бағыттағы жұмыстардың заңды жалғасы десек болады.
Шара барысында «Технологиялық даму жөніндегі ұлттық агенттік» АҚ өкілі Батырбек Дәуітбаев «Технологиялық даму жөніндегі ұлттық агенттік» АҚ қызметі туралы баяндады. Ол өз сөзінде инновациялық гранттарды иелену мүмкіндігі жөнінде айтып, өнертапқыштарды осыны тиімді пайдаланып қалуға шақырды. Осы жерде мінберге сұранған жергілікті ғалым Алтай Зинуллин елімізде ұлттық технологияларды дамытудың кенже қалғанын айтып, «Технологиялық даму жөніндегі ұлттық агенттік» АҚ өкіліне осы мәселені жедел қолға алу қажеттігін жеткізді. Бұдан кейін «КазИИТУ» кешенінің құрылтайшысы, академик Ақсерік Сарыұлы «Мемлекеттік міндеттерді шешудегі интеграциялық процесстердің ғылымдағы, білімдегі және тәжірибедегі рөлі» тақырыбында баяндама жасады. Оның сөзінше, «ҚазИИТУ» кешені ресейлік оқу орындарымен тығыз байланыста жұмыстануда. Соңғы төрт жылдың ішінде қазақстандық жастардың білім алуы үшін «Дубна» университетінен 2 аспирантқа, 40 магистратрантқа және 30 бакалаврға орын бөлінген. Дубнада оқып жатқан жастардың толыққанды білім алуы үшін барлық жағдай жасалғанын жеткізген ғалым осының барлығы да интеграциялық ықпалдастықтың нәтижесі екенін айтты.
Оның сөзін жалғастырған облыс әкімдігі аппаратының ??КГУ «Қоғамдық келісім» экспертті-аналитикалық бөлімінің меңгерушісі Әсия Жумина «Ұлтаралық құзыреттілік және қоғамдық келісімнің қазақстандық моделі» жөнінде әңгімелесе, техника ғылымдарының кандидаты, Пенза мемлекеттік университетінің профессоры Петр Харитонов «Шығармашыл мамандардың кәсіби даму траекториясының үздіксіз қалыптасуы» туралы баяндады. Сондай-ақ, форумға қатысушылар техника ғылымдарының кандидаты, «Дубна» университетінің тұрақты инновациялық даму кафедрасының профессоры Сергей Кибальниковтің «Қазіргі заманғы әлем дегеніміз не және біз оның дамуын қалай көреміз» атты тақырыптағы пленарлық баяндамасын да ықыласпен тыңдады.
Осыдан кейін Ресей Федерациясының белгілі өнертапқышы, Пенза мемлекеттік университетінің академигі, профессор, «Архимед салоны» мүшесі Петр Харитонов инновацияны дамытуға белсенді атсалысқаны үшін бір топ жерлестерге медальдар мен арнайы дипломдар табыстады. Олардың қатарында облыстық мәслихат хатшысы Мәлік Құлшар мен «КазИИТУ» ғылыми-білім кешенінің ұжымы және Назарбаев атындағы зияткерлік мектептің оқушысы Әзиз Талапов бар. Сондай-ақ, Катар Республикасында өткен 12-халықаралық робототехника Олимпиада қатысушылары мен облыстық инновациялық «INNOVA-2015» конкурсының жүлдегерлеріне де арнайы диплом табыс етілді.
Айша ӨТЕБӘЛІ
«Орал өңірі»
