Кәсіпкерлік палатасы Бөкей ордасы ауданының филиалы жұмыссыз жүрген жастарды еңбекке тартып, өз кәсіптерін ашуларына жәрдемдесуде. Жүргізілген үгіт-насихат жұмыстарының нәтижесінде сайқындық Асан Құттығалиев пен мұратсайлық Ерден Харесов бизнеске бет бұрып, өз жобаларымен жақында аудан әкімі Нұрлан Рахымжановтың қабылдауында болды.
Ата-анасымен бірге тұрып жатқан Асан дәнекерлеу ісін жақсы меңгерген көрінеді. «Ауылдастарымыздың жағдайы жылдан-жылға жақсарып келеді. Үйлерін сыңғырлатып қойған олар енді дуал тұрғызып, аулаларын жаңарту үстінде. Темір қақпа мен есікке тапсырыс берушілер де көбеюде. Несие алып, кәсібімді кеңейтпекпін», – дейді ол. Баласының ойын кұптаған әкесі кепілдікке тұрғын үйін қоюға да келісімін беріпті.
Еңбекқор жігіттерге іске сәт дей отырып, өзгелердің де бизнеске батыл бет бұруын қалаймыз.
Гүлжаз БАДЕЛОВА
Бөкей Ордасы
