Қазақстанның Құрметті спорт қайраткері, ҚР еңбек сіңірген жаттықтырушысы, КСРО спорт шебері, Бөкей Ордасы ауданының Құрметті азаматы, халықаралық дәрежедегі төреші Жұбаныш Садырұлы Жәрдемовтың жүлдесі үшін Сайқын ауылындағы М-С.Бабажанов атындағы орта мектеп базасында қазақ күресінен 1999-2001 жылы туған жасөспірімдер арасында облыстық турнир өтті. Оған өзіміздің өрендерімізбен қоса Орал қаласынан, Жәнібек ауданынан палуандар келіп, барлығы 50-ге тарта жасөспірім бағын сынады.
9 салмақ категориясы бойынша боз кілемде белдескен палуандардың арасында санаулы секундта қарсыласының жауырын жерге тигізгендер де, айла-тәсілдің арқасында жеңіс тұғырынан табылғандар да болды. Спорт додасының ашылу салтанатына арнайы келген Ж.Жәрдемов жеңіске жеткен палуандарды құттықтап, төрелік жасаған бапкерлерге ризалығын білдірді.
Раушан Бақытова
Бөкей Ордасы ауданы
