Табиғи монополияларды реттеу және бәсекелестікті қорғау комитетінің Батыс Қазақстан облысы бойынша департаменті «Жайықжылуқуат» АҚ-ның жылумен қамту қызметіне жаңа тариф бекітті.
-Орал қаласын жылумен қамтитын кәсіпорынның тарифі 2012 жылы бекітілген еді. Сол кездегі тауарлық газдың бағасы 1000 текше метріне (ҚҚС-сыз) 10380,21 теңге болатын. Алайда содан бергі үш ішінде газдың бағасы әлденеше мәрте өсті және бүгінде 1000 текше метріне (ҚҚС-сыз) 14827,95 теңгені құрайды. Яғни газ бағасы 42,8 пайызға өскенмен, жылумен қамту бағасының өсімі 10 пайыз шамасында қалған. Осындай жағдайларды елеп-екшеген аталмыш департамент жылу қызметі тарифін өсіруді жөн санаған. Бірақ тариф тек бюджеттік мекеме-ұйымдарға өсірілді. Ал тұрғындарға және өзге де тұтынушыларға жылу тарифі бұрынғы күйінде қалды,- деді аталмыш департаменттің бөлім басшысы Сержан Жаманқұлов.
Департаменттің бұйрығымен биылғы 10 қазаннан бастап жылумен қамту тарифі тек мемлекеттік мекеме-ұйымдарға, бюджеттік кәсіпорындарға өсіріліп, 1 Гкал үшін (ҚҚС-сыз) 9009,92 теңге деп белгіленді. Тұрғындар үшін тариф бұрынғыша 3109,22 теңге, өзге тұтынушыларға 3346,07 теңге (ҚҚС-сыз). Сонымен қатар суды ысыту үшін төлем өзгеріссіз қалды, яғни 1 текше метр үшін 164,79 теңге, бір адам үшін (есептеуіш құралдарынсыз, ҚҚС-сыз) 601, 48 теңге.
Гүлбаршын ӘЖІГЕРЕЕВА
