Орал қаласында «Қыс – 2015» республикалық командалық-штабтық оқу-жаттығу шеңберінде арнайы тактикалық жаттығулар өткізілді.
Шара П. Атоян атындағы стадионның алдында жедел қызметкерлер мен техникалардың дайындығын тексеруден басталды.
Оқу-жаттығу кезінде Жәңгір хан көшесіндегі Шаған өзенінен өтетін көпір тұсында жұқа мұздың ойылу салдарынан суға батқан автокөлік жолаушыларын құтқару, көктайғақ кезінде Орал-Атырау тас жолының бойындағы Круглоозерное ауылы маңында көлік апатына ұшырағандарға жедел көмек көрсету, сондай-ақ қала ішіндегі электр желілері мен газ құбырларында орын алған апаттық жағдайларды қалпына келтіру жұмыстары ойдағыдай жүзеге асырылды.
- Тәжірибелік сабаққа жедел әрекет ететін жасақтың облыстық және қалалық құрамынан 135 адам және 42 арнайы техника қатысты. Оқудың мақсаты жедел құтқару қызметкерлерінің өзара бірлескен түрдегі іс-қимылдарының тиімділігі мен нәтижелілігін шыңдау болды, - дейді облыстық ТЖД-дағы төтенше жағдайларды жою бөлімінің басшысы Нұрболат Мұқаев.
Нұртас НАБИОЛЛАҰЛЫ
«Орал өңірі»
