Қазталов ауданы, Бостандық ауылдық Мәдениет үйінде өңiрiмiзге белгiлi әнші Нұржан Қадыржанұлы Тасболатовтың «Тәуелсіздікке тағзым» атты концерттік бағдарламасы өттi.
Туған ауылында өткен кеште әнші өз репертуарынан Т.Базарбаевтың "Ауылым", Е.Хасанғалиевтің "Қайдасың, еркем?", А.Бажанованың "Асыл ана" және Т.Молдағалиевтің сөзіне жазылған Б.Ғұбайдулиннің әні "Күтпеген кездесу" секілді ауылға, достарға деген сағынышты толғаған, туған жер, ата-ана тақырыптарындағы әндерін шырқады.
Шара барысында облыстық жастар шығармашылығы орталығының әншілері Асланбек Қуаналиев, Альберт Ғазизжанов, Мұратжан Османов, Казталов аудандық Мәдениет үйінің әншісі Мұрат Ахметов және кеш иесінің туған бауыры Асылжан Тасболатовтар да ән шырқап, ауыл тұрғындарының ықыласына бөленді. Кешті белгілі ақын Ерікқали Ахметов жүргізді.
Концерттік бағдарлама соңында көрермендер атынан Жәдігер Үмбетов пен ауылдық округ әкімі Манарбек Сүндетов кеш иесi мен өзге де өнерпаздарға алғысын білдірді.
Тәуелсіздіктің 25 жылдығына арналған бұл шараны облыстық жастар шығармашылығы орталығы ұйымдастырды.
Айта кетейік, НҰРЖАН ҚАДЫРЖАНҰЛЫ ТАСБОЛАТОВ 1973 жылдың 4 мамырында Батыс Қазақстан облысы, Қазталов ауданына қарасты Бостандық ауылында дүниеге келген. 1990 жылы Бостандық ауылдық орта мектебін, 1994 жылы М.Өтемісов атындағы БҚМУ-ды бітірген. Бірнеше халықаралық және республикалық байқаулардың лауреаты. Өңіріміздің мәдениет саласында түрлі деңгейде қызмет атқарған. Бүгінгі таңда облыстық жастар шығармашылығы орталығы директорының орынбасары лауазымында жемісті еңбек етуде.
www.zhaikpress.kz
