Жайық өзенінің экологиялық жағдайын жақсарту мақсатында Батыс Қазақстан, Атырау және Ресей Федерациясының Орынбор облыстары бірлескен “Таза жағалау” акциясын бастады.
Аталмыш шараның іске асуына ҚР Парламенті Мәжілісінің депутаты Е. Тарасенко жетекшілік ететін тарихи-мәдени, экологиялық, спорттық “Жайық - достық өзені” экспедициясы, өзен жағалауындағы елді мекендердің тұрғындары, мемлекеттік мекемелер, түрлі шаруа қожалықтары мен кәсіпорын қызметкерлерінің қолдау көрсетіп, Жайық бойын тұрмыстық қалдықтардан, құлаған ағаштардан, күл-қоқыстардан тазарту жұмыстарына атсалысты.
- Батыс Қазақстан облысында халық шаруашылығы мен тұрғындарды ауыз сумен қамтамасыз етудің негізгі көзі Жайық өзенінің бассейні болып табылады. Облыс халқының 75 пайызы тұратын елді мекен осы өзеннің бассейнінде орналасқан. Сондықтан Жайық өзенінің экологиясын қалыпты сақтау, оған жыл сайын ауқымды тазарту жұмыстарын жүргізу баршамыздың міндетіміз. Биыл тазарту жұмыстарына 3 мыңнан астам адам тартылатын болады, - деді облыстық табиғи ресурстар және табиғат пайдалануды реттеу басқармасының басшысы А. Дәулетжанов. Ал ҚР Парламенті Мәжілісінің депутаты Е. Тарасенко:
- Туған жердің табиғаты мен тағдырына барлығымыз жауаптымыз.
Бұл экспедиция жылдар бойы туған өлкеге шын жаны ашитын көптеген адамдардың басын біріктірді. Биыл Бөрлі ауданының Приуральный ауылынан бастау алған сапарымыз ойдағыдай жүзеге асатынына сенімдімін. Мақсат – халықтың экологияға деген көзқарасын өзгертіп, мәдениетін көтеруге атсалысу, - деп акцияға қатысушыларға алғысын білдірді.
Қаламыздың 7 учаскесінде өткен тазалау жұмыстарына ҚР Қорғаныс министрлігінің әскери-техникалық мектебінің курсанттары, “Жасыл Ел” жасақтары, туризм орталықтары, “Батыс Су арнасы” ЖШС, “Уральскстройинвест” ЖШС, “Жайық жылу қуат” ЖШС, “Алтын Алма” ЖШС қызметкерлері жұмылдырылды.
Ләззат ШАҒАТАЙ
