Қаратөбе ауданының орталық алаңында «Сәт-сапар, жас түлек!» атты мектеп бітіруші түлектерге арналған салтанатты кеш оздырылды.
Алдымен аудан әкімі Асхат Шахаров түлектерді, ұстаздарды, ата-аналарды айтулы мерекелерімен құттықтап, ізгі тілегін жеткізді.
Аудан басшысы Асхат Берлешұлы Қаратөбе мектеп-гимназиясының түлектері, «Алтын белгі» иегерлері Ақнұр Беркінова (облыс бойынша 125 балл жинаған бірден-бір түлек) мен Асият Хасиноваға төсбелгілерін табыс етті.
Сонымен қатар, үздік аттестат иегерлері мен 100-ден жоғары балл жинаған жас түлектер де марапатталды.
Жас түлектерге бағалы сыйлықтар тарту етілді.
Мерекелік салтанатта ата-аналар атынан Нұрбол Бозов, түлектер атынан Асият Хасинова сөз сөйледі.
Мереке шырайын аудандық мәдени-демалыс орталығының көркемөнерпаздары әсем әнмен әрледі.
Шара соңында Қаратөбе аспанында от шашу орнады.
Ертай БИМҰХАНОВ
Қаратөбе ауданы