Қаратөбе аудандық мұрағат мекемесіндегі Қаратөбе өңірінен шыққан даңқты жазушы-драматург Рақметжан Малабаевтың жеке қорынан 1929 жылы Қызылордадан басылып шыққан «Жаңа әдебиет» деп аталатын журналдың №7, 9, 10, 11 сандары табылып отыр.
Журнал бетінен қазақтың көрнекті ақын-жазушылары Бейімбет Майлин, Ғабит Мүсірепов, Әбдірахман Байділдин, Молдағали Жолдыбаев, Шәймерден Тоқжігітовтердің алқа мүшесі болғандығын аңғаруға болады.
«Казиздат» баспаханасынан шығып тұрған басылымның таралымы – 3000 дана.
Латын, араб, орыс тілінде жазылған басылым беттерінде қоғамдық-саяси тақырыптағы мақалалар, әдеби туындылар, өлеңдер бар.
«Жаңа әдебиет» журналының кезекті сандарында «Саяси арна», «Іледегі еңбек», «Оңтүстік жолда», «Өлке комиссияларының делегаттары келгенде», «Сабыр Сәрінұлы. Сүлік», «Ембі», «Алатау», «Бұғыбайдың өлеңі», «Үйретіп- үйреніп. Күздің түрі. Қуаныш», «Зәбрек. Достардың әңгімесі», «Өмірқұлдың өмірі. Оралымның өлеңі», «Айтыстың бөлімі» т.б мақалалар мен туындыларға орын берілген.
Соның ішінде «Жаңа әдебиет» журналының 1929 жылғы сентябрь №9 (21) санынан «Көк үйдегі көршілер» әңгімесін кездестіруге болады.
Журналдың кезекті бір санында: «Бейімбет. Көзілдірік. 3 бөлімді пьеса. Бәсі 27 тиын. Шағын арада басылып шықты. Жергілікті білім дүкендерінің бәрінде де сатылады. Көптеп алатындарға скидка жасалады. Ақшасын жіберіп тура алдырамын деушілерге адрес: Қызылорда. Казиздат» делінген құлақтандыру да жарияланған.
Ғасырға жуық уақыт бойы сақталған басылымдағы араб тілінде жазылған әдеби туындыларды аудару, оқу араб тіліне жетік филолог мамандардың жұмыстануын қажет етеді.
Ертай БИМҰХАНОВ
Қаратөбе ауданы
