Ақжайық ауданының орталығы – Чапаевтағы мәдени-демалыс орталығында «Үздік жас отбасы» аудандық байқауы өткізілді. Отбасы күні қарсаңында өткізілген бұл шара халқымыздың жанұялық құндылықтарын насихаттауға арналды.
«Отбасылық альбом» немесе «Өнеге – отбасынан» (әр жұп өз жанұясын бейнефильм арқылы таныстырады), «Таң қалдырыңыз» – үй тапсырмасы, «Отбасы – бақыт ордасы» – сұрақтарға жауап беру, «Қазағымның қазынасы» – ұлттық киім үлгісі (өзіндік ерекшелігімен), міне, осындай шарттармен сынға түскен жұптар балаларымен бірге өздерінің білімдерін, ұмтылыстарын көрсетті. Жамбыл ауылдық округінен Жасұлан-Гүлбаршын Ақмышевтар үй іші – «Жаңашыл отбасы», Ақжол ауылдық округінен Ақболат-Назым Сельбаевтар үй іші – «Өнерлі отбасы», Базаршолан ауылдық округінен Хасан-Мейрамгүл Теміровтар үй іші – «Өнегелі отбасы» аталымымен марапатталды.
Жайық ЖЕЛЕК
Ақжайық ауданы