Биыл Жаңақала ауданы мектептерін 268 оқушы бітіреді. Олардың ҰБТ-ға қатысуға тілек білдіргені 151 оқушы немесе 56,3 пайызы. Бұл облыс бойынша ең аз қатысу көрсеткіші болып отыр.
Түсінік жұмыстары тек оқушылармен ғана емес, ата-аналармен де жүргізіліп келеді. Сондай шаралардың біріне 14 мамыр күнгі облыстық білім басқармасының бөлім басшысы С.Темірғалиеваның қатысымен өткен жиынды атауға болады. Жиынға аудандағы барлық мектеп басшылары, мектеп бітірушілердің ата-аналары мен сынып жетекшілері қатыстырылды.
Жиында ҰБТ жайында, биылғы өзгерістер туралы кең түсінік берілді.
-Облыс бойынша биыл ҰБТ-ға 3171 бала, бітірушілердің 69,2 пайызы қатысады. Сіздің ауданда 56,3 пайыз қатысқалы отыр. Бұл облыстағы ең төмен қатыс.
Биылғы ҰБТ-дағы басты ерекшелік – тәртіп күшейтіледі. Өткен жылы ҰБТ өткен 7 күн ішінде облыс бойынша 48 мың тыйым салынған зат алынды. Олар – ұялы телефондар, есептеу құралдары, фотоаппараттар, флешкалар, дайын жауап көшірмелері.
Биыл мұндай жолсыздыққа үзілді-кесілді жол берілмейді. Ұсталған оқушы сынақтан шеттетіледі. Тіпті қолданып үлгермегеннің өзінде де. Осы мақсатта бейнебақылау қондырғылары күшейтіледі. Осыны ата-ана да, оқушылар да ескеруі керек,-деген облыстық білім басқармасының өкілі басқа да өзгерістер мен ҰБТ жайында кең түсінік берді. Ата-аналар мен ұстаздардың сұрақтарына да жауап берді.
Ө.Ақбасов
Жаңақала ауданы