Республикалық «24 kz» телеарнасы ұйымдастырған «Менің Наурызым» байқауында «Жайық Пресс» ЖШС «Ұжымды біріктірген мереке» аталымы бойынша үздік деп танылған болатын. Бүгін «24 kz» арнасының жүлдесі пошта арқылы аталым иесіне жеткізілді.
Расында да, табиғат-ана бусанып, жер бетіне шуағын шашып келетін Ұлыстың ұлы күні - Наурыз мейрамы «Жайық Пресс» ЖШС медиахолдингінің ұжымында жыл сайын кең көлемде аталып өтеді.
Қалыптасқан дәстүр бойынша, бұл күні бөлім, редакциялар жайған дастарханға қазақтың қадірлі қонағына тартар басы мен асы, ақ бауырсағы, қазы-қарта, шұжық, тары-талқан, жент-ірімшік, қаймақ-май, айран-көже, басқа да ұлттық тағамдары қойылып, халқымыздың қонақжай дәстүрімен ұжым мүшелері мен медиахолдинг меймандарына ұсынылады. Әрине, ешкім де мерекелік дастарханның басты тағамы ақ ырыс (көктемнің өнімі), қызыл ырыс (қысқы тағам) және көк ырыстың (жазғы тағам) басын қосып, жеті түрлі тағамнан жасалған Наурыз көжеден ауыз тимей кетпейді.
Ұлттық киім киіп, қырмызыдай құлпырған қыз-келіншектер мерекенің ажарын ашып, сәнін келтірсе, ер-азаматтар да жасына лайық ұлттық киімдерін иықтарына іледі.
Басым көпшілігі өзге ұлт өкілдерінен тұратын «Приуралье» газетінің журналистері биыл ұлттық киімдерді сатып алып кигендігін айтып өткен абзал. «Жыл сайын жалға алып жүретінбіз. Биыл әрқайсымыздың өзімізде болсын деп шештік. Ою-өрнекті әдемі қамзолды күнделікті киіп жүрсек те, артық емес», дейді олар.
Ұлыстың ұлы күні бес қабатты ғимараттың әр қабатында орналасқан әкімшілік бөлімі, облыстық "Орал өңірі", "Приуралье" газеттері, ақпарат орталығы бір-біріне қонаққа барып, ән шырқалып, күй шертіледі, өлең оқылып, тілек айтылып, ақсақалдар бата береді.
Сонымен қатар ұлттық мерекенің мазмұнын арттыра түсу үшін журналистер жыл сайын қазақ халқының құда түсу, сырға салу, бесікке салу, шілдехана, тұсау кесу, т.б. салт дәстүрлерінен көрініс дайындайды.
Былтырғы Наурыз мейрамы да өзіндік ерекшелігімен есте қалды. Медиахолдинг ғимаратының алдына әкелінген сүліктей қара тұлпарға мініп көруге ниет білдірген балалар мен ересектердің қарасы мол болды.
Мерекелік шараға жиналған тек ұжым мүшелері ғана емес, мекеме орналасқан Мұхит көшесінің тұрғындарына бағзы заманнан ер қанаты боп есептелетін жылқы малының тұрпаты таныстырылып, ер-тұрман, ат әбзелдерінің атаулары, не үшін қолданылатыны туралы түсінік берілді.
«Ұйымдастыра білген ұтады» дегендей, осындай жан жақты, мазмұнды шаралардың ұжым мүшелерін біріктіріп, ынтымағын арттыра түсері анық.
Айгүл Ахметова
