Жас ұрпақты ата-баба дәстүрімен тәрбиелеу, әже тәрбиесін үлгі ету, әжелер өнегесінің ерекшелігін ашу мақсатында Бөрлі ауданының «Достық» үйі ғимаратында жастар ресурстық орталығының ұйымдастыруымен «Әжелер - көңілдің ажары, немере – өмірдің базары» атты байқауы өтті. Байқау «таныстыру», «менің ертегіші әжем» (ситуациялық жағдай), «немереміз-әжеміз, өнерліміз- бәріміз» (өнер сайысы) атты 3 кезеңнен оздырылды.
Өз өнерлерін барынша ортаға салған әжелеріміз бен немерелеріміз «өнерлі әже мен ақылды немере», «сымбатты әже мен бал тілді немере», « өнегелі әже мен тапқыр немере», « шебер әже мен ақылды немере», « белсенді әже мен өнерлі немере» номинациялары бойынша марапатталып, ынталандыру сыйлықтарына ие болды.
Байқау соңында әжелеріміз ұйымдастырушыларға алғыстарын айтып, «Қарттарын сыйлаған елдің болашағы бар. Немерелерімізбен, балаларымызбен тату-тәтті ғұмыр кешіп жатқанымызға біз бақыттымыз»,- деп Бағила әжеміз өз ризашылығын осындай сөздермен білдірді.
Аида ЕСЕНАМАНҚЫЗЫ
Бөрлі ауданы