Туберкулезбен ауырған адамның дәріні уақытылы қабылдамауы немесе өз бетімен дәрі ішуді тоқтатуы жиі кездесетіні мәлім. Денсаулық сақтау және әлеуметтік даму министрлігінің 2015 жылғы 5 мамырдағы №318 "Туберкулезге қарсы мамандандырылған ұйымдарда мәжбүрлеп емдеуді ұйымдастыру, сондай-ақ онда науқастардың болу режимі туралы" бұйрығына сәйкес, науқастар бір айдың ішінде дәрі қабылдаудың 7 дозасын үзген жағдайда, сот шешімімен мәжбүрлеп емдеу мекемесіне жолданады.
– Атап айтар болсақ,-деді Ақжайық аудандық туберкулез ауруханасының дәрігер-фтизиатры Балзира Сұлтанова.- 2015 жылы 1 науқас ауданаралық туберкулезге қарсы ауруханаға мәжбүрлеп емделуге жолданды, қазір 3 науқастың ісі сотта қаралуда.
2015 жылы Ақжайық ауданы бойынша туберкулезбен алғашқы ауырған 19 науқас тіркелсе (2014 жылы – 18 науқас), алғашқы ауырған науқастардың 74%-ы профтексеріспен анықталды (2014 жылы – 66.6%). 2015 жылды 2014 жылмен салыстырғанда аурушаңдық көрсеткіші 160.0-ден 134.7-ге төмендеді, яғни 2014 жылы 62 науқас, ал 2015 жылы 57 науқас белсенді топта тұрды. Былтыр туберкулездің асқынған түрі тіркелген жоқ.
Бекем БЕКҰЛЫ
Ақжайық ауданы