Бүгін облыс әкімі Нұрлан Ноғаев іссапармен Тасқала ауданында болып, 2015 жылдың қыркүйегінде «Нұрлы жол» бағдарламасы арқылы іске қосылған Орал-Саратов тас жолының жұмысымен танысты. Аудан орталығына кіре берістегі қиюы қашқан жолды өз көзімен көрген өңір басшысы осы жұмысқа жауапты мамандардың жұмысын біраз сынға алды.
– Уақыт шектеулі, бір айдан соң мынандай жолмен облыс орталығына қатынас болмайды. Сіздердің жауапсыздықтарыңнан тұрғындар жапа шекпеуі қажет. Сондықтан ақпан айының 22-не дейін осы мәселені шешіп, жолды дұрыстауды тапсырамын, -деді Нұрлан Асқарұлы «Uniserv» ЖШС бас директорының шаруашылық жөніндегі орынбасары В.Цойға.
Берілген тапсырма дәл уақытында орындалатын болса санаулы күндерден соң тасқалалықтар жаңа жолмен жүретін болады.
Назгүл Серікқызы
Тасқала ауданы
