Бүгін өңірлік коммуникациялар қызметі орталығында облыстық білім беру басқармасы басшысының міндетін атқарушы Зәуре Гумарованың қатысуымен облыстағы білім беру ұйымдарының жаңа 2017-2018 оқу жылына әзірлігі туралы брифинг өтті.
2016-2017 оқу жылының 1 қыркүйегінен бастап еліміздің барлық 1 сыныптарында білім берудің жаңа бағдарламасы енгізілгені белгілі. Осыған орай, 2017-2018 жаңа оқу жылында 2,5,7 сыныптар жаңартылған білім бағдарламасына көшірілетін болады. Функционалдық сауаттылыққа бағытталған аталған бағдарлама 30 пилоттық мектепте апробациядан сәтті өтті. Жаңартылған білім беру бағдарламасы кестеге сәйкес 2018 ж. -3,6,8,10 сыныптар, 2019 жылы -4,9,11,12 сыныптар кезең-кезеңмен енгізіледі.
2016 жылдан бастап жаратылыстану-математика бағытындағы пәндер бойынша 563 педагог жергілікті бюджет есебінен ағылшын курстарымен қамтылды. Жаратылыстану-математика бағытындағы пәндерді ағылшын тілінде оқыту эксперименті жүргізілетін мектептердің тізімі анықталды. Баспаханаларға жаратылыстану-математика бағытындағы пәндер бойынша ағылшын тіліндегі оқулықтар және оқу-әдістемелік кешендердің 13271 данасына тапсырыс беріліп, сәйкесінше келісімшарттар жасалды.
Брифинг соңында облыстық білім басқармасы басшысының міндетін атқарушы Зәуре Базарғалиқызы журналистер сұрағына жауап берді.
Гүлжамал ЖОЛДЫҒАЛИ
zhaikpress.kz
