8-707-808-48-55
13.06.2018, 19:38
Оқылды: 85
«Ақжайық» шағын ауданында инженерлік желілердің құрылысы басталды

Темирболат Токмамбетов02Келер жылы облыс орталығында жер көлемі 425 гектарды құрайтын «Ақжайық» жаңа шағынауданының құрылысы басталады. Аталған ауданда 150 көп қабатты тұрғын үй бой көтеріп, 9600 оқушыға арналған сегіз жалпы білім беретін мектеп пен тоғыз балабақша, сонымен қатар денсаулық сақтау нысандары мен 78 балалар ойын алаңы да салынатын болады.


 

Темирболат Токмамбетов1Қазіргі таңда Орал-Саратов күрежолы бойында пайда болатын болашақ шағынауданға инфрақұрылым желілерін тарту жұмыстары қызу қолға алынды. Инженерлік желілердің жалпы ұзындығы – 124,8 шақырым. Ал жалпы сомасы – 3,92 млрд. теңгені құрайды.

Бүгін облыс әкімі Алтай Көлгінов құрылыс алаңында болып, мердігерлермен кездесті. Су, электр желісі, табиғи газ сияқты инженерлік желілерді жеткізуші құрылыс компанияларының басшыларымен жеке-жеке тілдесіп, мән-жайға толық қаныққан облыс әкімі жоспарланған жұмыстардың уақтылы және сапалы орындалуын тапсырды.

Темирболат Токмамбетов05-Құрылыс жұмыстарын жауын-шашын маусымы басталғанға дейін аяқтау қажет. Жаңбыр мен еріген қар суы ағатын арықтардың салынуын басты назарда ұстаған жөн. Электр желілері толықтай жердің астымен жүргізіледі. Бұл жерде заманауи стандарттар мен талаптарға жауап беретін шағынаудан пайда болады. Электр желілерін тарту кезінде цифрландыру аясындағы жұмыстарды да бірден қолға алу керек,-деді Алтай Сейдірұлы.

Темирболат Токмамбетов5Жалпы ұзындығы 25,6 шақырымды құрайтын сумен қамту желісінің (жалпы сомасы-370,025 млн. теңге) құрылысына жауапты бас мердігер «ПМК-117» ЖШС-ның директоры Ольга Попованың айтуынша, жұмыс кестеге сай ырғақты жүргізілуде.

-20-дан астам адам мамыр айынан бері жұмыс істеп жатыр. Жердің үстіңгі қабаты аршылып, арықтар қазылуда. Бүгінге дейін 4,5 шақырым полиэтилен құбырлар орнатылды. Нысанды бекітілген жоспарға сай қараша айында тапсыруымыз керек. Алайда, жұмысты мерзімінен бұрын, қазан айында аяқтауды жоспарлап отырмыз. Жаңа шағын аудан қаланың орталық сумен қамту желісіне қосылатын болады,-дейді ол.

Темирболат Токмамбетов3(1)Жалпы ұзындығы 10,9 шақырымды қамтитын газ құбырының (жалпы сомасы – 329,225 млн. теңге) құрылысына кірісіп кеткен «Лайгэ» ЖШС өкілінің айтуынша, «Ақжайық» шағынауданындағы әлеуметтік нысандар мен көпқабатты тұрғын үйлердің дербес, автономиялы жылу жүйесі болады. Шағын аудандағы әр квартал, шамамен 10-12 көп қабатты тұрғын үйге жылу қазандығы орнатылмақ. Қазір 26 қосалқы стансаның құрылысы жүруде. 10 киловатт желінің ұзындығы 33 шақырым, 0,4 кабельдің ұзындығы 57 шақырым. Жер асты кабельді желі тартылған соң, келесі кезекте көше жарығының тіректері орнатыла бастайды,-дейді бас мердігер.

Темирболат Токмамбетов10Газбен қамту жұмыстары тамыз айының соңы мен қыркүйек айының басында, электр желілерін тарту қыркүйек айында, ал су құбырларының құрылысы қазан айында аяқталмақ. Келер жылы алдымен көп қабатты тұрғын үйлердің, одан кейін әлеуметтік нысандардың құрылысы басталады.

Орал қаласының әкімі Мұрат Мұқаевтың айтуынша, жаңа шағынаудан мен қала аралығын байланыстыратын жаңа көпір де салынады.

-Шаған өзенінің арғы бетінен Сдықов және Мәметова көшелеріне дейін жалғайтын көпір құрылысының жобалық жұмыстарын келер жылы аяқтап, 2020-2021 жылдары жаңа көпірдің құрылысы жүргізіледі,-дейді шаһар басшысы.

Темирболат Токмамбетов07Облыс әкімі Алтай Көлгінов бүгін сондай-ақ Орал қаласындағы Құрманғазы, 196 мекенжайында орналасқан апатты үйдің тұрғындарымен де кездесті. 1937 жылы пайдалануға берілген жалпы ауданы 491 шаршы метрді құрайтын қос қабатты ескі үй сүріліп, орнына су жаңа тоғыз қабатты тұрғын үй салынбақ. Апатты үйді бір ғасырға жуық мекендеп келген сегіз отбасы уақытша пәтерлерге орналастырылған. Жаңа баспана құрылысын «Қазхол» ЖШС қолға алған.

- Өзі де құлағалы тұрған үйіміз бүгін сүрілді. Салынғанына 81 жыл болған ескі үй еді. Сегіз отбасы тұрып келдік. Іргемізден бой көтерген тоғыз қабатты үйден жанға жайлы жаңа пәтер алатын болдық. Қуанышымызда шек жоқ, біздің жағдайымызды түсініп, баспанамен қамтамасыз етіп жатқан облыс, қала басшылығына алғысымыз шексіз, -дейді апатты үйдің байырғы тұрғыны Александр Кошт.

Темирболат Токмамбетов09-Мемлекеттік жеке меншік серіктестік аясында былтыр тамыз айында 64 пәтерлік жаңа тұрғын үйдің құрылысы басталды. Қазір елуге тарта құрылысшы еңбек етуде, жұмыстың 70 пайызы аяқталды. Күзге дейін құрылыс толық аяқталып, апатты үйдің тұрғындары көшіріледі. Қалған пәтерлерді «Тұрғын үй құрылыс жинақ банкінің» салымшылары алады. Ал төменгі қабаттағы пәтерлер бұрын апатты үйде орналасқан сауда нысандарының иелеріне беріледі. Жалпы, осы маңнан 74 пәтерлік тоғыз қабатты үй мен 200 пәтерлік 11 қабатты тұрғын үй салынады,-дейді құрылыс басшысы Заман Қуанов.

Айта кетейік, облыс орталығындағы 200-ден астам үйдің 44-і апатты деп танылған. Жалпы, жыл басынан бері қала бойынша 2 тұрғын үй қолданысқа берілді. Сонымен қатар жыл соңына дейін «Нұрлы жер» бағдарламасы мен мемлекеттік жеке-меншік серіктестігі аясында 7 тұрғын үйді аяқтау жоспарланып отыр.
Олар: Тұрғын үй құрылыс жинақ банкі салымшылары үшін (облигациялық қарыз есебінен) 14 041 шарты метрді құрайтын 210 пәтерлі 2 тұрғын үй (№1 дақ, №43 дақ);
Халықтың әлеуметтік мұқтаж топтары үшін 20 079 шарты метрді құрайтын 396 пәтерлі 2 тұрғын үй (№39 дақ, №41 дақ);
Мемлекеттік жеке-меншік серіктестік аясында – 336 пәтерлі 3 тұрғын үй (Гагарин көшесі, №1, 2-шақырым көшесі №20, 21, 22, Құрманғазы көшесі, №198.)
Сондай-ақ осы жылы аталған мемлекеттік бағдарлама төңірегінде Зашаған кентінен 9 тұрғын үй – (1350 пәтер, жалпы ауданы 79 696 м2) және 7 тұрғын үй - (996 пәтер, жалпы ауданы 57 338 м2) қаланың Солтүстік-шығыс бөлігінде орналасатын болады.
Мемлекеттік жеке-меншік серіктестік бойынша апатты деп танылған 17 тұрғын үй бұзылып, орнына жаңа үйлер салу жоспарлануда.

Динара ЖҰМАБЕКҚЫЗЫ

zhaikpress.kz

 

Ұқсас жаңалықтар Басқа да жаңалықтар
Пікір қалдыру