Бейсенбіде Астана күніне орай қаладағы А.Островский атындағы театр алаңында «Ақжайық - шеберлер қаласы – 2017» атты қолөнер шеберлерінің көрмесі өтті. Бұған «Шаңырақ» әлеуметтік кәсіпорны, «Ұлттық өнер», «Нәзік», «Інжу», «Салықов», «Молдашева» ЖК секілді қолөнермен айналысатын елу шақты шеберлер компаниясы қатысты.
-Бұл шара «Азаматтық Альянс» ҮЕҰ аймақтық бөлімшесінің бастамасымен, қала әкімдігінің қолдауымен ұйымдастырылып отыр. Шараның негізгі мақсаты- ұлттық өнерімізді насихаттап, өңіріміздің алтын қолды адамдарын көпшілікке таныстыру. Өздеріңіз көріп тұрсыздар, көрмеде, негізінен ұлттық нақыштағы туындылар тұр.Осындай дүниелер арқылы қала балалары, жалпы тұрғындар ұлттық өнерімізбен танысады, таным көкжиегін кеңейтеді. Астана күніне орайластырып өткізіліп жатқан бұл шарада Елбасының «Болашаққа бағдар: Рухани жаңғыру» атты Жолдауында айтылғандай, ұлттық кодымызды сақтау және рухани құндылықтарымызды жаңғырту ісі басты тақырып болып отыр. Көрмеге шақырылған шеберлердің қолөнер туындыларының көбі ұлттық бағытта дайындалғаны да сондықтан. Дегенмен, көрмеге әкелінген туындылардың арасында моншақ, сырға сақина, тіпті табиғатты бейнелеген неше түрлі картиналармен қатар, қолдан тоқылған замануи аяқ киімдер де бар. Ана тұрған бесік жасайтын жігіт, «Аленеуов» ЖК өткенде 1 маусым –Балаларды қорғау күніне байланысты сол күні дүниеге келген бес бірдей сәбиге бесік сыйлады. Қазіргі таңда адамдардың сана-сезімі ашық, айқын, уақыт өткен сайын халқымыздың ұлттық құндылықтарының бағасы артып, барған сайын дәріптеле түсуде. Егер осындай салмақты шараларды жиі ұйымдастырып тұрсақ, болашақ ұрпағымыздың бойында еліне, жеріне деген құрмет, сүйіспеншіліктің одан сайын арта түсетіні сөзсіз. Мұндай шара өңірімізде тұңғыш рет ұйымдастырылып отырғандықтан, халық әлі үйрене алмай жатыр. Алдағы уақытта осындай игілікті шараны жиі өткізіп тұрсақ, халыққа, соның ішінде жастарға үлкен көмек болар еді, -дейді шараны ұйымдастырушылардың бірі Айгүл Түркина.
Шара барысында, келушілер назарына шынымен де неше түрлі бұйымдар ұсынылды. Мысалы, Нұрлан дейтін жігіттің («Аленеуов» ЖК) қолынан шыққан бесіктер 8-10 мың теңгенің айналасында болды. Көрпе–көпшігі жасаулы бесіктер 15–ақ мың теңге. Ал мына тұрған орталық базарда мұндай бесіктер 20-25 мың теңгеден бір-ақ шығады. Бұлардың қасында отырған көршісі – қалалық Наталья Мартынова мата қалдықтарынан қуыршақ тігудің шебері екен. Ол кәдімгі сіз бен біз пайдаланатын капрон шұлық пен мата қалдықтарын пайдаға жаратып, қуыршақтар мен жан-жануарлардың әдемі бейнелерін жасапты. Ол қызылды-жасылды боянған күркетауықты 2 мың теңгеге, ал Клоунды – 4000 теңгеге сатамын деп отыр. «Көпжасарова» ЖК-нің иесі Жанар мүмкіншілігі шектеулі болса да, қол қусырып үйде қарап отырғысы келмейді. Сондықтан, қолынан келетін өнерді пайдаға асыруды жөн көрген ол өзінің жеке кәсібін ашып, балаларға арналған қуыршақтар мен үй жиһаздарын, сондай-ақ, той-томалаққа арналған шашу ыдыстарын жасауды қолға алыпты. Оның қолынан шыққан дүниелер сондай әдемі көрінсе де, өте қымбат емес, 2- 4 мың теңге арасында. Оралдық Назгүл Ораз қолдан тоқыған шәркейлерін 2 мың теңгеге және «Тұрман» ЖК иесі Бадиғажамал Мусаева кәдімгі тоқыма жіптен тоқыған жазғы аяқ киімдерін 10 мың теңгеге ұсынды. Ал олардың қасында тұрған ордалық Артур Ғабдушев туған жерін кесе мен тәрелкеге және жейделерге таңбалап басып-ақ, табыс табуға бекінген сыңайлы. Артур тәрелкенің қақ ортасына Хан үйінің суретін, кесесінің сыртына Хан Ордасын бейнелепті. Ауылының әппақ құмына дейін суретке түсіріп, магнитті картинаға айналдыруының өзі оның туған жеріне деген ыстық ықыласын, ерекше құрметін көрсетсе керек.
Көрмеге М.Өтемісов атындағы университет ұжымы үлкен дайындықпен келіпті. Аталмыш оқу орнынан келген Бейбітәлі Досқалиев келушілерге үлкенді-кішілі домбыраларды және асатаяқ, қоржын, торсық, келі, ожау, кесе секілді ұлтымызға тән ыдыс-аяқтар коллекциясын көрсетті. Шебер шілденің аяғына таман барша оралдықтармен бірге Астана қаласына барып, туындыларын жан-жақтан ағылып келіп жатқан туристерге көрсететінін айтты. Оның қасында тұрған Нұрдәулет Асқарұлы мен Фараби Жанқадамовтың керамикадан жасаған құмыралары да көз тартады. БҚМУ түлектерінің қолынан шыққан картиналар қандай әдемі еді! Облыстық тарихи –өлкетану музейі ұсынған Ассамблея құрамындағы түрлі ұлт пен ұлыс киімдері де көпшіліктің қызығушылығын туғызды. «Жылқайдар» ЖК иесі сонау Сырым ауданы Аралтөбе ауылынан келіп, көпшілікке өз қолынан шыққан ат әбзелін таныстырды. Жеке кәсіппен айналысқанына биыл сегіз жыл болған Нәсіпқали Жылқайдаров жылқы малына арналған құрал-жабдықтардан басқа аяқ киім және түрлі мамандықтың арнайы киімдерін тігеді екен. Кәсіпкердің айтуынша, Сырымда және қалада орналасқан цехтарына тапсырыс үздіксіз түсіп тұр. Ирина Тетюеваның қолынан шыққан түрлі иіс сабындар, моншақ, алқа білезіктерге де қызыққандар көп болды.
Көрмеге қатысқан облыстық экологиялық балалар-жасөспірімдер орталығы тәрбиеленушілерінің қолынан шыққан дүниелердің жөні тіпті, бөлек. Орталық директоры Виктор Фоминнің айтуынша, балалар даярлаған бұл туындылар тұрмыстық қалдықтардан жасалған. Мысалы, «Балықшы туралы ертегі» атты картинада ертегі геройларын бейнелеу үшін негізінен, шеге, бекіткіш, батырма, пластмасса шөлмектердің қақпақтары секілді қалдық заттар пайдаланылған. Ал «Менің қиялымдағы қала» атты туындыда балалар әсем қала –Астана бейнесін иіссу, әтірлердің босаған шөлмектерінен жасапты. «Биылғы Жолдауында Елбасы прагматизм туралы, яғни, ысырапшылдыққа жол бермеу жөнінде айтты. Біз қалдықсыз өнім ережесін қатаң сақтап, қазіргі уақытта қалдықтарды да пайдаға асыруға кірістік» деді өз сөзінде Виктор Павлович.
Алаңқайдың шет жағын ала орналасқан 4-5 суретші көрме өтіп жатқан жердің «Арбат» деп аталатынын еске түсіріп тұрғандай. Олардың қайсыбірі бір-бірінің суреттерін салып, көрушілердің назарын өздеріне аударуға тырысса, шет жақта отырған кішкентай бойлы қазақ жігіті, керісінше, қасына ешкімді жақындатқысы келмей, әлек болды. Дегенмен, суретті тез әрі сапалы салатын бұл сабазға үйірсектер саны көрме біткенше азаймады. Біреу дуалап қойғандай, жеке суретін қолдан салдырғысы келгендердің бәрі нақ осы суретшіні жағалап, оның қасынан кетпей қойды.
Айтпақшы, көрме жұмысына облыстық жастар орталығының өнерпаздары мықты қолдау жасады. Олардың орындауында Отан-ана, Туған жер, Астана тақырыбындағы әндер бірінен соң бірі шырқалып, би де биленді.
Айша ӨТЕБӘЛІ,
«Орал өңірі»
Пікірлер
Зейнеп ТАУЛИНА, Қаратөбе ауданының тұрғыны:
-Көрме өте жақсы өтуде. Өңірімізде небір шеберлер бар екен, соларды көріп, қуанып тұрмын. Шеберлер көрмесінің осындай ашық далада өткені дұрыс болды, соның арқасында көптеген өнерлі адамдармен таныстық. Менің сұрайын дегенім, осындай алтын қолды адамдар мен дарынды жастарды бір компанияларға қосып, олармен келісім-шарт жасасып, бірге жұмыстануға болмай ма? Әйтпесе, нағыз дарынды адамдардың көбі өздігінен шыға алмай қалып жатыр ғой... Оларды қолдауға бір амал жасалса деймін.
Виктор ФОМИН, облыстық экологиялық балалар-жасөспірімдер орталығының директоры:
-Әр қаланың өз Арбаты бар. Міне, сол жерлерде дарынды адамдар өз өнерлерін көрсетеді. Арбаттарда өнер көрсету дегеніміз, бұл – дарынды адамдардың өзін өзі жарыққа шығаруы, басқаша айтқанда жарнамалауы. Оларға Арбат арқылы мүмкіндік берілгені дұрыс, мұның танымалдылыққа әсері мол. Олар, сондай-ақ, өз қолдарынан шыққан туындыларын саудалап, адал еңбегінің ақысын алады. Мен бұл жобаны қос қолымды көтеріп тұрып қолдаймын...
Айша Өтебəлі
zhaikpress.kz
