25.06.2019, 19:19
Оқылды: 116

Арыстан 50 бала Орал қаласында демалады

Арыстан 50 бала Орал қаласындағы «Дарын» қосымша білім орталығында демалады, деп хабарлайды ҚазАқпарат тілшісі.

 20190625193303

Орталық директоры Гүлсім Дүйсенғалиеваның мәлім еткеніндей, арыстық жеткіншектер 10-19 шілде аралығында тынықпақшы.

 «Арыстағы оқиға бәріміздің қабырғамызға аяздай батты. Сондықтан бұдан біз де қалыс қалмай, сергіп қайтсын деп балаларды демалуға шақырдық»,- деді Г.Дүйсенғалиева.

Оның сөзіне қарағанда, биыл «Дарында» барлығы 420 бала демалмақ. Қазірдің өзінде алғашқы екі ауысымда 210 жасөспірім тынықты. Бұлардың бастапқысында физика-математика бағытында олимпиада, байқауларда оза шауып жүргендер болса, екінші лектегілер - IT саласында талаптанып, табысқа жеткен оқушылар.

Күні бүгін облыста алғаш рет «Жайық Пресс» ЖШС-ның қолдауымен «Өрімтал» жас тілшілер легі (100 бала) демалуда. Олардың арасында Абай, Әбіш, Қадыр, Мұқағали оқуларында жеңімпаз-жүлдегер атанғандар баршылық.

«Дарындағы» әр күнде түрлі шаралар жоспарланған. Мұнда балалар демалып қана қоймайды, өз шеберліктерін жетілдіреді, өздері сынды құрбы-құрдастарымен тәжірибе алмасады, өңірге танымал адамдармен кездеседі.

20190625193221

Төртінші ауысым аты - үш тұғырлы тіл. Мұның ерекшелігі - Арыстағы жасөспірімдермен бірге көршілес Самара облысындағы қазақ диаспорасы отбасыларынан 20 бала келіп, өз күндерін қызықты өткізетін болады», -деді орталық директоры.

Айта кетейік бүгін Арыс қаласы тұрғындарына көмек көрсету үшін батысқазақстандық мекеме-ұйымдар қатарында Орал қаласы әкімдігі, сондай-ақ «Батыс су арнасы» ЖШС-ның 900 қызметкері бір күндік жалақыларын аудару жөнінде шешім қабылдады.

 

Узнайте первым о важных новостях Западного Казахстана на нашей странице
в Instagram и нашем Telegram - канале