Бүгін облыс әкімі А.Көлгінов Мемлекеттік сыйлықтың иегері, танымал саясаттанушы Дос Көшім мен ҚР Журналистер Одағының мүшесі, тіл жанашыры Абдрашит Абдрайымовпен кездесті.
Кездесу барысында Елбасы Н.Назарбаевтың "Болашаққа бағдар: рухани жаңғыру" бағдарламасының өңірлерде жүзеге асуы талқыланды. Әсіресе бағдарламаны тиісті деңгейде насихаттауда, түсіндіруде зиялы қауым өкілдерінің маңызы зор екені атап өтілді. Сондай-ақ латын әліпбиіне көшудің мәні мен маңызы туралы кеңінен әңгіме өрбіп, оның тәуелсіз Қазақстан үшін беретін мүмкіндіктері айтылды.
Өз кезегінде облыс әкімі А.Көлгінов: - Елбасының "Рухани жаңғыру" бағдарламасы - ауқымды, терең жоба. Ол бізді біртұтас мемлекет ретінде беріктігімізді нығайта түсуге үндейді. Сондай-ақ латын әліпбиіне көшу де болашақ ұрпақ үшін аса қажет екені анық. Бұл интеллектуал ұлт қалыптастыруды көздейтін еліміз үшін зор мүмкіндіктерге жол ашары сөзсіз. Жан-жақты, саналы ұрпақ тәрбиелеу - ортақ міндет. Бұл орайда сіздер секілді зиялы қауым өкілдерінің өңір жастарымен кездесуі ерекше маңызды" , деді.
Айта кету керек, белгілі саясаткер Дос Көшім апта соңына дейін оралдықтармен кездесулер өткізеді.
Рафхат Халелов
