Бүгін Оралдың оғланы, 2016 жылғы Бразилияда өткен Олимпиада чемпионы, халықаралық спорт шебері Данияр Елеусінов өзі оқып білім алған М.Ықсанов атындағы №36 орта мектебіне қонаққа келіп, жас спортшылармен кездесті. Чемпионмен бірге оның әкесі әрі бапкері Марат Елеусінов және Батыс Қазақстан облыстық дене шынықтыру және спорт басқармасының басшысы Тимур Шаяхметов те келді.
Айта кетейік, Данияр аталмыш мектептің табалдырығын 1998 жылы аттаған болатын. Кездесуге Данияр «Әліппені» жаттатқызып, қолына қалам ұстатқан алғашқы ұстазы Ахметова Зылиха Базарбайқызы және бірге оқыған сыныптастары арнайы шақырылды. Чемпион өз партасына отырып, балалық шағын есіне алды.
Мектеп оқушылары Данияр Маратұлына, бапкері Марат Талипұлына өздерін қызықтырған сауалдарын қойып, Олимпиада чемпионының балалық шағынан бастап, әлемдік дәрежедегі спорттық өмір жолы туралы еркін сұхбаттасты.
Мектеп директоры А.З.Губашева Даниярға естелік ретінде М.Ықсановқа арналған «Ұлы тұлға» кітабын тарту етті.
Кездесу соңында мәртебелі меймандарға арнап «Батырларға арнау» әні орындалды. Оқушылар болса, таласа-тармаса бес құрлықтың басы қосылған әлемдік додада олжа салған жерлес ағаларынан қолтаңба алуға асықты.
Айгүл Ахметова
