Бүгін Орал халықаралық әуежайында "EXPO-ға бірге" акциясы өтті. Облыстық жастар саясаты мәселелері басқармасы, облыстық туризм және сыртқы байланыстар басқармасы және облыстық жастар ресурстық орталығының қолдауымен өткен шараның мақсаты - EXPO-2017 халықаралық көрмесіне қолдау көрсету.
"Орал" студенттерінің Альянсы" корпоративтік қоры ұйымдастырған шарада әуежай жолаушыларының арасында сұраққа жауап беру арқылы "EXPO-2017" халықаралық көрмесіне қатысатын тегін билеттер ойнатылды.
Би билеп, бүлдіршіндерге шарлар үлестіріп, қызықты сұрақтар қойылған шараға жолаушылар белсенді қатысты. Нәтижесінде 30- дан астам жолаушының жұлдызы жанып, "EXPO-2017" халықаралық көрмесіне тегін билет ұтып алды. Олардың қатарында қаламыздағы №37 орта мектебінің 11 сынып оқушысы Наргиза Жангирова да бар. "Еліміздің жетіп жатқан жетістіктері үшін қуаныштымын. ЭКСПО-ға әлі билет ала қоймап едім. Бүгін тегін билет алып, қатты қуанып тұрмын", - дейді ол.
Әуежай жолаушылары өздеріне тосын сый жасап, қуаныш сыйлаған ақжайықтық жастарға шынайы көңілден ризашылықтарын білдірді.
Гүлжамал ЖОЛДЫҒАЛИ
zhaikpress.kz
