Облыс орталығындағы Оқушылар сарайында халықаралық дəрежедегі гроссмейстерлер Дəрмен Сəдуақасов пен Нұрлан Ибраев оралдық жас шахматшыларға шеберлік сағатын өткізді.
Балалар мен жасөспірімдер спорт мектебі, мектептен тыс жұмыс орталықтарының 40-қа жуық тəрбиеленушісі атақты шахматшылармен тақтада тартысты ойын өрнегін көрсетті. Мəні зор шараны өткізуге "Болашақ" ассоциациясы, Д.Сəдуақасов атындағы шахмат Академиясы жəне облыстық шахмат федерациясы мұрындық болды.
- Біз өңір басшысы А.Көлгіновтің арнайы шақыртуымен келдік. Бұндай сипаттағы турнирлер жылына бір рет ұйымдастырылады. Батыс жұртшылығы Ж.Саин, М.Қажығалиев, А.Өтеғалиев сияқты жас ойыншылармен мақтана алады. Олар - шахмат жұлдыздары, - деді Д.Сəдуақасов.
Шаршы тақтадағы ойын тартысты да қызықты өтті. 17 тақтада ойнаған гроссмейстер жас шахматшы Ерлан Нұхаевпен тең түсті.
Айта кетейік, Ерланның осы ойын түрінен екінші дәрежесі бар. Ол - көзі көрмейтін жас спортшылардың арасында Қазақстанның екі дүркін чемпионы. Жеті жасынан шахматты серік еткен өреннен жаттықтырушылары зор үміт күтеді.
2 мамырда командалық турнир өтетінін естеріңізге саламыз.
zhaikpress.kz
