Бұл жайында облыстық «Орал өңірі» мен «Приуралье» газеттерінің 100 жылдығына байланысты өткен республикалық ғылыми-тәжірибелік конференция барысында «Отырар кітапханасы» ғылыми-зерттеу орталығының директоры, алаштанушы, филология ғылымдарының докторы Тұрсын Жұртбай айтты.
- Алашорданың 100 жылдығы қарсаңында «Жайық Пресс» ЖШС ұжымы елеулі еңбек етті. Бірнеше жыл бұрын «Жайық Пресс» ЖШС-ның бас директоры Жантас Сафуллин «Қазақстан» газетінің жинағы шыққанын айтып, сүйінші сұраған еді. Одан кейін «Ұран» газеті туралы біраз мағлұматпен таныс болдық. Біз ту қылып ұстап жүрген «Айқап» жорналы мен «Қазақ» газеттерінің тарихы мен басылымды жарыққа шығарушылар жөнінде мағлұматтар мұндай толыққанды жинақ болып шыққан жоқ. Медиахолдингте еңбек етіп жатқан баспасөз тарихын зерттеу орталығының жетекшісі Қазыбек Құттымұратұлының еңбектерімен де кеңінен таныспын. Қазіргі уақытта айтылып жатқан «рухани жаңғыру» сөзінің мәніне терең үңілсек деймін. Алаш идеясының басты тақырыбы – жер мәселесі болды. Батыс Қазақстан облысындағы алғашқы басылымдар жөнінде деректер енген жинақта ел мүддесіне қатысты жайттар, ең бастысы, «рухани жете» ұғым кеңінен көрініс тапқан. Жалпы жаңғыру дегеніміз не? Біз құр ұрандап қана қойсақ, биікке шарқ ұра алмаймыз. Мен жаһандану заманында рухани жаңғыруды «ұлттық майдан, азаматтық күрес» деп қабылдаймын. Осы ұлттық майданды бұрынғы ордалықтар, қазіргі батысқазақстандықтар ерте бастап кетті. 100 жылдан кейінгі жаңғыру жаңа бастауға ұлассын, - деді жазушы-ғалым.
Нұртай Текебаев
zhaikpress.kz
