Бүгін ҚР Парламенті Мәжілісінің депутаттары Аманжан Жамалов, Гүлжан Қарағұсова, Татьяна Яковлева Орал қаласы маңындағы Зашаған кентінде «Квант» ЖШС-ның еңбек ұжымымен кездесті.
Серіктестік директоры Михаил Пшеничный депутаттарға алдымен жиһаз фабрикасының жұмыс қарқынын көрсетті. Оның айтуынша, фабрика 2015 жылы «Бизнестің жол картасы – 2020» бағдарламасы аясында іске қосылған. Жобаны «БТА банк» АҚ қаржыландырған. Михаил Пшеничный биыл аумағы 10 мың шаршы метр құрайтын ағаш өңдеу цехын ашу жоспарланғанын айтты. Онда да сапалы жиһаздар құрастырылады.
«Мемлекет жобаны қамтамасыз етуге 6 пайыз жеңілдікпен несие қаржысын береді. Елдегі валютаның құнсыздануына байланысты Қытай тауардың нарықтағы бағасын түсірген еді. Сондықтан өндіріске қажетті материалдар алуға қолайлы жағдай туды. Қазіргі уақытта Белорусь, Ресей, Украин мемлекеттеріндегі жиһаз бағасын бақылап отырмыз. Біздің ұсынатын жиһаздың құны 20-25 пайызға арзан», – деді ол.
Кәсіпорын ішінара тауарларды Ресейге экспорттайды. Қазақстанда «Квант» компаниясына тиесілі 16 дүкен бар.
– Жаһандық дағдарыс әсерінен шикізат бағасы қатты құлдырады. Елбасының тапсырмасы бойынша ел Үкіметі шағын және орта кәсіпкерлікке қолдау білдіруде. Сол арқылы экономика тұрақтылығын сақтау, бюджетке шағын және орта бизнес субъектілері төлейтін салық негізінде кіріс түсіру көзделген. Осы экономикалық саясат бүгінде оң нәтижесін беруде. Мәселен, «Квант» ЖШС-ның кәсіпорны шығарып жатқан корпустық және жұмсақ жиһаздар, паралон матрас және бұл бағытта басқа да қажетті материалдардың сапасы жақсы әрі экологиялық тұрғыда таза, бағасы арзан. Компания басшылығы жаңа жұмыс орындарын ашуға ниеттеніп отырғаны да қуантады, – деді Парламент Мәжілісінің депутаты Аманжан Жамалов.
Нұртай Текебаев
www.zhaikpress.kz
