Облыс әкімі Алтай Көлгінов Орал қаласындағы Ж.Молдағалиев атындағы №2 және №33 мектептің соңғы қоңырау салтанатты шарасына қатысты.
Өңір басшысы мектеп ұжымын кезекті оқу жылының сәтті аяқталуымен құттықтап, өмірдің жаңа белесіне қадам басқан жас түлектерге жылы лебізін білдірді.
– Қазақстанның болашағы өздеріңіздей білімге құштар ұрпақтың қолында. Ал мемлекет бүгінгі жастар алаңсыз білім алуы үшін бар жағдайда жасауда. Оны жыл сайын білім беру саласына бөлінетін бюджеттік қаражаттың артуынан, еліміздің түкпір-түкпірінде жаңа мектептер мен жоғары оқу орындарының бой көтеруінен анық байқауға болады. Біздің облысымызда да білім саласына баса мән беріліп келеді. Жуырда өңірімізге жұмыс сапарымен келген ҚР Президенті Қасым-Жомарт Тоқаев үш ауысымды оқытуды толықтай жойып, апатты жағдайдағы мектептер мәселесін шешуді тапсырған болатын. Осы бағытта бұрыннан бастау алған жұмыстар бүгінде жалғасын табуда. Мәселен, қаламыздағы №33 мектептің ғимараты ескі болуына байланысты апатты деп танылып, бүгінде аталмыш білім ордасының шәкірттері №2 мектептің базасында білім алуда. Алдағы уақытта апатты мектептің орнына жаңа ғимарат бой көтеріп, жаңа білім ошағында сапалы білім алу мүмкіндігі туады, – деді Алтай Сейдірұлы.
Мектеп қабырғасына бүлдіршін болып қадам басып, бүгінде жаңа өмір белесіне бет бұрған жас түлектерді Ж.Молдағалиев атындағы №2 мектептің директоры Әлима Төреғалиева және №33 мектептің басшысы Үміт Ерғалиева құттықтап, 2018-2019 оқу жылында мектеп шәкірттерінің қол жеткізген жетістіктеріне де тоқтала кетті.
Аяужан Кереева,
суретке түсірген Темірболат Тоқмамбетов
zhaikpress.kz
