Сән көрсетілімі мен оған қатысушылар жайлы "GS Production" сән және кино мектебінің директоры әрі "UralskFashionWeek" шарасының бас ұйымдастырушысы Гүлназ Смаилова өңірлік коммуникациялар қызметінде өткен брифингте әңгімелеп берді. Алматылық дизайнер, "Сhinara_Ylmuratovna" ательесінің иесі Шынар Датхабаева мен өзбекстандық дизайнер, "ElmiraBatyrova" тігін үйінің иесі Эльмира Батырова да брифингке қатысты.
Гүлназ Нұрбергенқызының айтуынша, "UralskFashionWeek" сән көрсетілімі 2017 жылдан бері жылына екі рет – көктем мен күзде ұйымдастырылып келеді. Бұл жолы 7 наурыз күні әйелдердің халықаралық күніне орай өтеді. Сән көрсетілімі Хадиша Бөкеева атындағы облыстық драма театрда 18:00-де басталады. Кіру тегін.
Алматы, Атырау және Өзбекстанның астанасы Ташкент қаласынан келген және оралдық он дизайнер өз көйлектер коллекциясын ұсынады.
Бүгінде Орал қаласындағы "GS Production" сән және кино мектебінде жас мөлшері 4 пен 22 аралығындағы 60 модель дәріс алуда. Олардың кейбірі шетелдік сән көрсетіліміне қатысып, жарнама мен көркем фильмге түсіп үлгерген.
zhaikpress.kz