Орал қаласында көрісу салтына байланысты шаралар Абай алаңындағы шағын қойылымнан басталды. Х. Бөкеева атындағы облыстық қазақ драма театрының әртістері ұлттық киім киіп, қазақтың кәрі-жасы аралас қуана қауышатын дәстүрін бейнеледі, көрермендерге ақтан дәм татқызып, бауырсақ таратты. Қойылымда ақсақал бата беріп, баршасына жақсылық тіледі.
Ақжайық жастары атынан студенттер флеш-моб ұйымдастырды. Одан кейін Островский атындағы драма театрдың алдында «Бір жасыңмен!» атты атты театрландырылған концерт басталды.
– Елбасымыздың «Болашаққа бағдар: рухани жаңғыру» мақаласында жазылғанындай, біз ата-баба дәстүрін жылдан-жылға жаңғыртуға баса мән берудеміз. Соның бірі – бүгін өтіп жатқан шуақты да жарқын көрісу мейрамы. Көктем лебі сезілетін күн. Ғасырлар бойы бабалар бұлжытпай ұстаған дәстүр. Көрісу – жаңа жылдағы жаңғыру мерекесі. Кішілер үлкендерге сәлем беріп, ағайын, дос-жаран өкпе-ренішін кешіріп, ізгі тілектерін жаудырып, бір-бірімен қуана 
қауышады. Бұл дәстүр Батыс өңірінде ғана емес, өрісі кеңейіп, еліміздің түкпір-түкпірінде аталуда. Көрісу бүгінде жалпыұлттық мерекеге айналды. Оны тойлауда ұлт-ұлыстар арасында шекара жоқ, – деді Орал қаласының әкімі Мұрат Мұқаев.
Сахнада қазақтың ән-күйлері төгіліп, ұлттық салт-дәстүрден көріністер қойылды.
Нұртай Текебаев
zhaikpress.kz
Фото: Айбатыр Нұраш
