Облыс көлемінде Бүкілқазақстандық ағаш отырғызу күніне орай сенбілік ұйымдастырылып, ағаштарды әктеу және қала аумағын санитарлық тазалау жұмыстары жүргізілді.
Тазалық акциясына мемлекеттік және коммуналдық мекемелер қызметкерлерінен 19 157 адам қатысты.
Сондай-ақ меншік иесіне қарамастан, қаламыздағы 603 мекеме-ұйым да шараға атсалысты.
Облыс орталығындағы жоғары оқу орындары мен колледждерден 600 студент және 300 жұмысшы жұмылдырылып, Орал қаласындағы 80 ПИК тазалық акциясына үлес қосты. Сонымен қатар қаланың солтүстік-шығыс бөлігіндегі Қызылжар көшесіне 400 түп және бірқатар кәсіпорынның ұйымдастыруымен 600-ден астам ағаш отырғызылды.
Бұдан басқа жоғары оқу орындары мен техникалық және кәсіптік білім беру мекемелері студенттерінің қатысуымен Әбілқайыр хан даңғылы, С. Датов көшелері бойындағы ағаштар әктеліп, Гагарин, Ружейников көшелері, Орал – Желаев тасжолы және Деркөл кентіндегі ТЖЖ-2 ауданында да санитарлық тазалау жұмыстары атқарылды. Дәл осы күні БҚО табиғи ресурстар және табиғат пайдалануды реттеу басқармасының ұйымдастыруымен 100-ден астам қала тұрғыны Хан тоғайын тазалау жұмыстарына атсалысты.
Жолаушы тасымалдау мекемелерінен бөлінген 5 автобус және 25 борттың көмегімен қала аумағынан жалпы көлемі 703 м3 қоқыс шығарылды.
Аяужан Кереева,
zhaikpress.kz