Қаратөбе ауданына қарасты Жусандыой ауылдық округінде Тәуелсіздігіміздің 25 жылдық мерекесіне орай, мейірбандық айлығы аясында мүмкіндігі шектеулі жандар арасында аудандық «Өмірге құштармыз, өнерлі жандармыз» атты өнер байқауы өтті.
Ең басты мақсат – мүмкіндігі шектеулі жандардың талантын ұштап, олардың өздеріне деген сенімдерін нығайту. Бұл шара мүмкіндігі шектеулі жандардың дарынын танытуға, шығармашылығын дамытуға, өмірге құштарлығын арттыруға бағытталды.
Алғаш сөз алған аудандық жұмыспен қамту және әлеуметтік бағдарламалар бөлімінің басшысы Бақытжан Жүсіпқали қатысушыларға сәттілік тіледі.
Байқауға қатысушылар 5 кезең бойынша сынға түсіп, өз өнерлерін ортаға салдып, бір-бірлерінен қалыс қалмады.
Байқауда ерекше көзге түсіп, көрермен көзайымына айналған Сулыкөл ауылдық округі атынан қатысқан Гүлайна Қантаева І орынды иеленсе, ІІ орынды Жусандыой ауылдық округінен қатысқан Аяжан Төремұратова, ІІІ орынды Егіндікөл ауылдық округі атынан қатысушы Аружан Дарханқызы алды. Байқауға қатысушы Қаратөбе ауылдық округінен Жансая Орынғали мен Саралжын ауылдық округінен Медет Дүйсеғалиев алғыс хаттармен марапатталды.
Барлық жеңімпаздарға бағалы сыйлықтар табысталды. Байқауға ауылдық округтегі шаруа қожалығы жетекшілері, кәсіпкерлер демеушілік жасады, - дейді Жусандыой ауылдық кітапханасының кітапханашысы Ұлболсын Тұрғанбайқызы.
Тоты ЕСҚАЙЫРОВА
