Ақжайық ауданында «Мейірбандық күндері» барыншы ұтымды ұйымдастырылып келеді.
Айталық, ауыл әкімдігі мен Чапаев орман және жануарлар дүниесін қорғау жөніндегі мемлекеттік мекемесінің бастамасымен бірнеше отбасыға, оның ішінде мүмкіндігі шектеулі жаны бар 4 жанұяға қысқы отындық ағаш түсіріп берді.
Ауыл әкімдігі бір мүмкіндігі шектеулі жанға 12950 теңге көлеміне азық-түлікпен көмектесіп, 2 отбасыға 30000 теңгеге ауласын қоршайтын дүниемен жәрдемдесті.
«Талпыныс», «Байқара», «Рахат» шаруа қожалықтарының жетекшілері Самархан Қажығалиев, Серікқали Батыров және Ғалымжан Хамзин 3 отбасының ауласына қысқы мал азығын түсіріп берді. Ринат Жұбанов, Қарлығаш Құсаинова, Мақуза Қабанова сынды кәсіпкерлердің де ауыл-елге көмегі зор.
- Коловертное ауылындағы бір отбасыға «Дабыс», «Мейірбек», «Талпыныс», «Жерұйық», «Айболат» шаруа қожалықтарының жетекшілері Өтеғали Дабысов, Нұрым Шүкіров, Самархан Қажығалиев, Баймұрат Меңдібаев, Айболат Кадыров бірнеше бас уақ жандық, тұрғын Амангелді Түсіпқалиевтің өзі 2 бас уақ жандығын апарып берді,- дейді Жаңабұлақ ауылдық округі әкімі аппаратының жетекші маманы Айбат Төлегенов.
Бекем БЕКҰЛЫ
Ақжайық ауданы