29 маусымда шамамен сағат 10.30-да БҚО, Бәйтерек ауданы, Переметный ауылдық округі, Калинин ауылы, Есенин көшесі, 12/1 мекенжайы бойынша жеке тұрғын үйдің төбесінен 100 шаршы метр өрт шыққан болатын.
Өртті жоюға БҚО ТЖД «ӨС және АҚЖҚ» ММ №24 өрт сөндіру бекетінің кезекші қарауылы жеке құрамнан 5 адам, 2 бірлік техника жұмылдырылды. Өрттің шығу себептері мен жағдайларын, кінәлі тұлғаларды және материалдық шығын сомасын жан-жақты, толық және объективті зерттеу мақсатында материал Бәйтерек ауданының полиция бөліміне жіберілді, - дейді Бәйтерек аудандық төтенше жағдайлар жөніндегі бөлімнің бастығы Қайрат Жұмағалиев.
Осындай жағдайға тап болған көпбалалы Еркін Бисимбаевтың отбасының тұрмысымен танысқан Орал қаласындағы Талғат Шудабаев бастаған жастар еріктілері бөлек шот ашып, әлеуметтк желі арқылы қаражат жинастыруға үндеу жариялайды.
- Біз Переметный ауылында болып, отбасы жағдайымен таныстық. Басында жақын маңнан пәтер жалдап тұруға 70 мың теңге қаражат бердік. Одан соң 5 тонна цемент, 3 «Камаз» көлігімен гравий түсірілді. Жуық арада 2000 тас апарып бермекпіз.
Бізден басқа да жомарт жандар аталмыш отбасыға көмек қолын созуда. Жақында бейтаныс жандар есік-терезе апарып беріпті, - дейді ерікті Талғат Шудабаев.
Ертай Бимұханов,
zhaikpress.kz
