Ақжайық ауданының Тайпақ ауылдық округіндегі «Серібол» шаруа қожалығында электр қуаты мәселесі шешілді. Мұнда 4 млн. теңгенің жел генераторы және күн батареялы модульді-гибридті стансасы орнатылды.
Бұл қожалық орналасқан Жұбанәлі қыстағы айталық, Тайпақтан 25 шақырым жерде. «Серіболдың» 35 жасар иесі Болат Рақымберлиевтің сиыр, жылқы, қой өсірумен айналысқанына 4 жыл таяды.
Ауданда баламалы электр көздерін пайдалануға қызығушылық танытып отырған шаруа қожалықтарының қатары біртіндеп көбеюде. Инвестициялық салынымдар тарту арқылы жыл басынан Ақсуат, Алмалы, Ақжол, Мерген ауылдық округтеріндегі 9 шаруа қожалығы модульді гибридті су тарту стансасын, 4 шаруа қожалығы күннен қуат алатын батарея орнатты. Бұл жобаның тиімділігі сол, инвестициялық салынымның 80% дейін субсидияланатыны. Былтыр күн батареясын 35 шаруа қожалығы алған еді.
Бекем БЕКҰЛЫ
Ақжайық ауданы
