Облыс әкімі Ғали Есқалиев Шыңғырлау аудандық аурухана қызметкерлерімен жүздесті.
Шара барысында аудан орталығындағы аурухана мен Ақшат ауылдық округіндегі медициналық пунктке жаңа «жедел жәрдем» көліктерінің кілті табысталды.
Орталық саябақта аудан ардагерлерімен ашық әңгіме-дүкен құрды.
Ғали Нәжімеденұлы елдегі жұртшылықпен тығыз қарым-қатынас орнату және жергілікті билік тарапынан шешілмей жатқан түйінді мәселелерді облыс басшылығына тікелей жеткізу мақсатында Шыңғырлау ауданы бойынша өзінің қоғамдық өкілі Ерсайын Шәтеновті таныстырды.
Ерсайын Қапезұлы 26 жыл бойы осы ауданда тұрып, мемлекеттік қызмет саласында түрлі басшылық лауазымдарды атқарған, ауданның мән-жайын жақсы біледі, ел-жұрт арасында сый-құрметке ие. Ұсынылған кандидатураны үлкен-кіші түгел қоштап, өңір басшысының халықпен тығыз қарым-қатынас орнату бағытындағы қадамына сәттілік тіледі.
Сонымен қатар облыс әкімі аудандық «Қазпошта» филиалының жаңа ғимаратын, «Рухани жаңғыру» бағдарламасы аясында осыдан бір жыл бұрын ашылған, бес залдан тұратын аудандық тарихи-өлкетану музейін аралап көрді.
Аяужан Кереева,
суретке түсірген Темірболат Тоқмамбетов
zhaikpress.kz