Мемлекет басшысы Н.Ә.Назарбаевтың «Болашаққа бағдар: рухани жаңғыру» атты бағдарламалық мақаласы нағыз прагматикалық, нақты әрі түйінді, еліміздің болашағы үшін тағдыршешті мәселелерді көтерген атаулы құжат екені даусыз.
Зеленов ауданы әкімдігінің мәжіліс залында облыс аудандарының ішінде алғаш боп қолға алынған «СұңқарСмартСити» пилоттық жобасы таныстырылымын ел назарына ұсынған «Элайтс» ЖШС қаржылық директоры Алексей Корнишкин жобаның басты ерекшеліктеріне тоқталды.
Елбасымыздың «Цифрлы Қазақстан» бағдарламасы аясында жүзеге асқалы отырған жобаның таныстырылымы жайлы ой қозғаған аудан әкімі Асхат Шахаров:
- Цифрлы технология біздің өмірімізге тәуелсіздік алған тұста енгізіле бастады. Осы ретте алдымен мектептер жаппай компьютерлендірілді.
Компьютерлер кеңседе де, үйде де негізгі ақпараттық құрал ретінде пайдаланыла бастады, ақпаратпен орындалатын кез келген жұмыс компьютер көмегімен жүзеге асырылатын болды. Осылайша, ақпаратты сақтау мен тасымалдау ісі жолға қойылды.
Президенттің жыл сайынғы Жолдауларында елімізде үлкен экономикалық және технологиялық дүмпу болуы тиіс екендігі баса айтылады. Ал ол үшін, бұл бағытта ең алдымен, барша адамзат баласына қажетті IT саласына басымдық берілу тиіс.
Елбасы Жолдауына сәйкес елімізде «Цифрлы Қазақстан» мемлекеттік бағдарламасы іске қосылды. Ақпараттық технологиялар қарыштап дамыған заманда IT саласын қолға алмасақ, дамыған 30 елдің қатарына ену қиынға соғатындығын Елбасымыздың өзі тап көрсетті. Өйткені, өркениетті елдердің барлығы осы цифрлы жүйеге көшіп, өнеркәсібінің дамуын және халқының әл-ауқатын жылдан-жылға жақсартып келеді, - деді.
Негізінен алғанда, «Цифрлы Қазақстан» бағдарламасын жүзеге асыруда 4 бағыт бар. Бірінші бағыт – ауыл-аймақты кең жолақты интернетпен қамтамасыз етіп, Қазақстанның транзиттік әлеуетін арттыру. Екінші бағыт – экономиканың салаларына (көлік және логистика, денсаулық сақтау, білім беру, ауыл шаруашылығы және электронды сауда) цифрлы технологияны ендіру. Үшіншісі – мемлекеттік органдар жұмысының сапасын арттыру болса, төртінші бағыт – IT-мамандарды даярлау.
Ауданда жүзеге асқалы отырған пилоттық жоба «СұңқарСмартСити» деп аталады.
Қашықтық арқылы басқарылатын құрылғының өзіндік ерекшелігі де бар.
Арнайы құрылғы (дрон) жоғары көтеріліп, аудан аумағының қауіпсіздігін бақылауға алады.
Қоғамдық тәртіпті сақтауды оңтайландыру, дала өрті, су тасқыны сынды төтенше жағдайлардың орын алуы, өршуіне жол бермеу, қауіптің тез арада көзін жоюда аталмыш құрылғы бірден көмекке келеді.
Құрылғы қажеттілік бойынша онлайн режимде жұмыс жасайды.
Құрылғының ауданның кез келген нүктесінен қажетінше түсірілім жүргізуге мүмкіндігі бар.
Басқару орталығындағы арнайы мамандар барлық жағдайды онлайн режимде бақылауға алады. Жағдай туындаған кезде тиісінше тез арада нұсқау беріп, шешім қабылдауға әрекет жасайды.
Біз құрылғы жұмыстарын жүргізуші IT-мамандарды даярлап, курстар ұйымдастырып, оларға әдістемелік көмектер көрсетеміз - дейді «Элайтс» ЖШС қаржылық директоры Алексей Корнишкин.
Ертай БИМҰХАНОВ,
Зеленов ауданы
