2022 жылдың қараша айында Риддер қаласында апат орын алды. Бұл қала тұтынушыларына жылу берудің төмендеуіне алып келді.
Прокуратураның қадағалау актісі бойынша «Риддер Жылу электр орталығы» АҚ-ға 11 млн теңге айыппұл салынды. Ал Риддер тұрғындарына жылу тиісінше жеткізілмегені үшін 63 млн теңге өтелді, деп хабарлайды Шығыс Қазақстан облысының прокуратурасы.
Фото: Ашық көздерден алынған
Аталған жағдайдың себептерін анықтау үшін Шығыс Қазақстан облысының прокуратурасы уәкілетті органдардың мамандарымен бірлесіп, кәсіпорын қызметінде тексеру жүргізді.
Оның нәтижесінде «Риддер ЖЭО» АҚ-ның қанағаттанарлықсыз техникалық жай-күйін көрсетті.
240-тан астам заңнаманы бұзу фактісі анықталған.
Прокуратураның қадағалау актілері бойынша уәкілетті органдар ЖЭО-ға қатысты бұзушылықтарды жою туралы нұсқама шығара отырып, 11 млн теңгеден астам әкімшілік жаза қолданды.
Прокуратураның ұсынысы бойынша «Риддер ЖЭО» АҚ жылу энергиясын тиісті деңгейде жеткізбегені және сапасының нашарлағаны үшін төлемді қайта есептеу арқылы 63,3 млн.теңгеге 21,7 мың тұтынушыға залал өтелді.
Бұдан басқа, тексеру барысында 548 млн. теңгеге тарифтік смета мен инвестициялық бағдарламаның қаражатын мақсатсыз жұмсау туралы табиғи монополиялар туралы заңнаманы бұзу фактісі анықталған.
«Риддер ЖЭО» АҚ үшін 2023 жылғы 1 сәуірден бастап 2024 жылдың 31 наурызына дейін халыққа тарифті 18% төмендете отырып, уақытша өтемдік тарифті бекітті.
