Бүгін Казталовта «Айбын» спорт клубының ұйымдастыруымен үстел теннисінен мекеме және кәсіпорын қызметкерлері арасында ішкі біріншілік өтті.
Жарыстың негізгі мақсаты – салауатты өмір салтын сақтай отырып, үстел теннисі спортын дамыту және спортшылардың арасында достық қарым-қатынасты нығайту. Ашылу салтанатында аудандық дене шынықтыру және спорт бөлімінің басшысы Берік Рахымғалиев жарысқа қатысушыларға сәттілік тіледі.
Шеберліктері мен кәсібилігін көрсететін бәсекеге Бөкей орда табиғи резерваты, жұмыспен қамту және әлеуметтік бағдарлама бөлімі, Казталов мектеп-лицейі, Алма Оразбаева мектебі, Алма Оразбаева мектебі 2, балалар жасөспірімдер туризмі және экология орталығы, жастар ресурстық орталығы, балалар жасөспірімдер спорт мектебі, «Айбын» спорт клубы 1, «Айбын» спорт клубы 2 командалары қатысты.
Ұлдар арасында І орынды Нұрдәулет Каресов (Казталов мектеп-лицейі) қанжығасына байласа, Нұркен Ахметов (Жұмыспен қамту және әлеуметтік бағдарламалар бөлімі) ІІ орынға, Мейрам Гиляжов (Балалар мен жасөспірімдер спорт мектебі) ІІІ орынға ие болды.
Бұл жарыста қыздар да ер балалардан қалыс қалмай өздерінің қырағылықтарын көрсете білді. Қыздар арасында жүлделі І орынды Гүлдария Дүйсенбиева (Жұмыспен қамту және әлеуметтік бағдарламалар бөлімі) иеленсе, ІІ орынды Данагүл Айтмағанбетова (А.Оразбаева мектебі), ІІІ орынды Гүласыл Нұғманова (А.Оразбаева мектебі) місе тұтты.
Жалпы командалық есепте І орынды – Казталов мектеп-лицейі, ІІ орынды – жұмыспен қамту және әлеуметтік бағдарламалар бөлімі, ІІІ орынды – «Айбын» спорт клубы иеленді.
Жарыстың соңында «Айбын» спорт клубы директорының оқу-ісі жөніндегі орынбасары Жүніс Жолдыбаев жеңімпаздарды арнайы дипломмен марапаттап, кубоктар мен естелік сыйлық табыстады.
Мейірім Парасат
Казталов ауданы
