Бүгін Жаңақала ауданының Мәстексай ауылдық округінде жаңа мәдениет үйі халық игілігіне пайдалануға берілді.
Ауыл тұрғындарына тамаша тарту болған мәдениет үйінің ашылу салтанатына аудан әкімінің орынбасары Ақнұрлы Еслямғалиева, мәслихат хатшысы Серік Жәрдемалиев, аудандық мәдениет, тілдерді дамыту, дене шынықтыру және спорт бөлімінің басшысы Данял Танзенов және мәслихат депутаттары арнайы қатысып, барша ауыл тұрғындарын айтулы қуанышымен құттықтады.
Жаңа жыл мерекесі мәстексайлықтар үшін қуанышы мол, есте қалар ерекшелігімен басталды.
«Ауыл – ел бесігі» бағдарламасы аясында құны 250 693 мың теңге тұратын заманауи ғимаратты Дамир Балмулдин басқаратын «Батыс Котло Монтаж» ЖШС алты ай мерзімде салып берген.
Сондай-ақ Ақнұрлы Нұрғалиқызы Дамир Өмірзақұлына аудан әкімінің алғысхатын табыс етті. Аудандық сәулет және құрылыс бөлімінің басшысы Асылбек Төлешев Мәстексай ауылдық округі әкімі Ержан Тілепбергеновке нысанның кілтін табыстады. Одан әрі ауыл ақсақалы Теміржан Сапарғазиев пен мәдениет саласының үздігі Ерлан Сатыбаев салтанатты түрде лента қию рәсімін жасады.
Ақ жаулықты әжелер шашу шашып, келген қонақтар ғимарат ішін аралады. Шара концерттік бағдарламамен жалғасын тапты.
Қуанышты сәтте, ел игілігіне берілген ғимаратты аралаған ауыл тұрғындары аталмыш мәдениет ошағының тек жастардың ғана тынығатын орны емес, үлкендердің де бас қосуына лайықты, жалпы ауыл халқының рухани өсу ордасына айналарына сенім білдірісіп жатты.
Райхан Хамзина,
Жаңақала ауданы
zhaikpress.kz
