Қарағанды қаласында 20-30 маусым күндері аралығында тоғызқұмалақтан жасөспірімдер арасындағы Қазақстан Республикасының жекелей чемпионаты өтті.
400-ге жуық спортшы қатысқан чемпионатта Батыс Қазақстан облысы атынан Сырым ауданының тоғызқұмалақшылары да бақ сынаған болатын.
Нәтижесінде, А.Шайхиев атындағы Сырым аудандық балалар-жасөспірімдер спорт мектебінің, Абай мектеп-бөбекжай-балабақша кешенінің 4 сынып оқушысы Нұрәли Жолдыбай 9 жасқа дейінгі ұлдар арасында тоғызқұмалақтың “рапид” түрінен ІІІ орын иеленді.
- Аталған чемпионатқа 6 оқушым қатысып, соңғы айналымға дейін жоғары деңгейде ойын өрнегін көрсетті. Шәкіртім Нұрәли финалдық ойында Ақмола тоғызқұмалақшысымен сынға түсіп, ІІІ орын бұйырды. Оқушыларымның барлығы да бабында тұр. Жеңісті күндеріміз әлі алда,- дейді ақжолтай хабармен бөліскен тоғызқұмалақтан сырымдық жаттықтырушы Дарын Төреғалиев.
Айжан Амангелдина,
Сырым ауданы
zhaikpress.kz