Бүгін қалалық БҚО ТЖД жедел құтқару жасағы базасында арқанды саябақ ашылды. Орал қалалық әкімдігінің және төтенше жағдайлар басқармасының бастамасымен қолға алынған ерекше саябақтың ашылуына қала әкімінің орынбасары Асхат Кулбаев, спорт ардагерлері, төтенше жағдай басқармасының мамандары және оқушылар қатысты.
Табиғат аясында қала тұрғындары мен қонақтары спортпен айналысып, денсаулығын нығайтуы үшін барынша жағдай жасалған. Аумағы 7 гектарды қамтитын саябақ жұма мен жексенбі күндері аралығында сағат 10.00-ден кешкі 17.00-ге дейін жұмыс жасайды.
Қала әкімінің орынбасары Асхат Кулбаев арқанды саябақтың ашылуы – қала тұрғындарының табиғат аясында алаңсыз демалып, спортпен айналысуы үшін жасалған игі бастама екендігін және саябақты ашу үшін бюджет қаржысы жұмсалмағанын атап өтті.
Орал қалалық дене шынықтыру және спорт бөлімінің басшысы Артур Шерғалиев арқанды саябақты алдағы уақытта спорттық-туристік бағытта дамыту үшін жұмыстар жасалатындығын тілге тиек етті.
- Бұл жерде алдағы уақытта түрлі спорттық шаралар ұйымдастырылатын болады. Қыс мезгілінде ардагерлер және мүмкіндігі шектеулі жандар арасында шаңғы жарыстарын, үлкен спартакиадалар өткізу жоспарлануда.
Алдағы аптаның жұма-жексенбі күндері сағат 10.00-ден кешкі 17.00-ге балалар, қала тұрғындары арқанды саябаққа келіп, табиғат аясында демалып, спорттық жарыстарға қатысуына болады. Басты мақсат – табиғатты бүлдірмей, таза ауада дене шынықтыру. Саябақта «Орал» спорт клубының мамандары болады. Бәрі тегін, - дейді Артур Мұратұлы.
Гүлжамал Жолдығали,
zhaikpress.kz
