Бүгін Жаңақала аудандық дене шынықтыру және спорт кешенінде аудандық жастармен жұмыс жөніндегі ресурстық орталығы және «Jastar» спорт клубының ұйымдастыруымен ересектер арасында қазақ күресі мен үстел теннисінен аудандық турнир өтті.
Спорттық шараның ашылу салтанатына аудан әкімінің орынбасары Ақнұрлы Еслямғалиева, аудандық ішкі саясат бөлімінің басшысы Ақан Қапанов, аудандық мәдениет, тілдерді дамыту, дене шынықтыру және спорт бөлімінің басшысы Талғат Жанболатов, аудандық жасөспірімдер мен балалар спорт мектебінің директоры Жайсан Есекенов және мекеме басшылары қатысты.
Шарада құттықтау сөз сөйлеген аудан әкімінің орынбасары А.Нұрғалиқызы жарысқа қатысушы спортшыларға сәттілік тіледі.
Спорт додасына Жаңажол, Мұқыр, Мәстексай, Пятимар, Бірлік, С.Меңдешев ауылдық округтерінен спортшылар келіп бақ сынады.
Жарыс барысында қатысушылар тыңғылықты әзірлікпен келгендерін байқатып, тартысты ойын өрнегін көрсете білді.
Жарыс қорытындысында қазақ күресінен +90 келі салмақ дәрежесінде I орынды Дәурен Жағыпаров (Жаңажол ауылдық округі) иеленсе, II орын Тілек Кенжеғалиев (Жаңақала ауылдық округі) еншіледі. Ал, III орынды Нұрбек Сұпығалиев (С.Меңдешев ауылдық округі) қанжығасына байлады. Одан әрі 90 келі салмақ дәрежесінде I орынды Ақжол Әділғалиев (Жаңақала ауылы) иеленсе, II орынға Ерғанат Малдыбаев (Мұқыр ауылы), III орынға Алтынбек Болатов (Жаңажол ауылдық округі) табан тіреді.
Үстел теннисінен ерлер арасында I орынға Әділғали Жолдыбаев «Жаңақала ауылы), II орынға Берік Қабиев (Жаңақала ауылы), III орынға Рамил Насыров (Мәштексай ауылдық округі) ие болды. Сондай-ақ әйелдер арасында үстел теннисінен I орынды Динара Қуанышқалиева (Бірлік ауылдық округі), II орынды Дария Жұлқашева (Пятимар ауылдық округі) олжаласа, III орынды Әсем Аюпова (Жаңажол ауылдық округі) місе тұтты.
Тартысқа толы спорттық додада жеңімпаздар марапатталып, ұйымдастырушылардың атынан естелік сыйлықтар табыс етілді.
Ақсәуле Сексенбайқызы,
Жаңақала ауданы
zhaikpress.kz
