Адамзат санасында сұрапылдығымен есте қалған соғыс жылдары тарихын ұлықтайтын ұрпақ барында ұмытылмақ емес. Ұлы Отан соғысындағы Жеңіс – майдангерлер мен тыл ардагерлерінің қажымас қайраты мен қайсар рухының жемісі.
Биыл 76 жыл толатын Ұлы Жеңіс бізге аталардың қанымен, аналардың көз жасымен келді. Сын сағатта ойланбастан омырауын оққа тосқан батыр бабаларымызды ұлықтап, есімдерін ұрпақ жадында қашанда жаңғырта беру – біздің перзенттік борышымыз. Қанқұйлы соғыста от кешкен оғландар Теректі ауданында да жетерлік. Қаншама жауынгер майдан даласында қаза тапты. Соғыстан кейінгі жылдарда елдің экономикасы мен әлеуетін көтерген де сол азаматтар, яғни жеңіс жауынгерлері екенін ұмытпауымыз керек. Сол сұрапыл жылдары майданға аттанған ер-азаматтың орнын басып, тылда қалған қыз-келіншек, бұғанасы қатпаған бала, еңкейген кәрі тыным таппай еңбек етті. Бәрі де жеңіс үшін деп жұмылды. Жастық шағы, кемел жасы соғыстың қанды жылдарымен тұспа-тұс келген аға ұрпақтың біздің азат, бейбіт өміріміз үшін бар қайратын бойына жиып, қандыбалақ жауды талқандаған ерлігі ешқашан ұмытылмақ емес.
Өкінішке қарай, жыл өткен сайын майдангерлер мен тыл еңбеккерлерінің қатары сиреп барады. Ортамыздағы жалғыз Жеңіс сарбазы Александр Этманов пен 332 тыл ардагері біздің ерекше құрметіміз бен қамқорлығымызға ие.
Жаңа буын, өскелең ұрпақ Ұлы Жеңістің қандай қиындықпен келгенін, аға буынның ерлігі мен ізгі ұстанымдарын жадында сақтауы тиіс.
Құрметті ардагерлер, сіздердің Отан үшін көрсеткен ерліктеріңіз бен еңбектеріңіздің алдында бас иеміз. Елімізде бейбіт өмір мен ынтымақ тұрақтылық пен тыныштық әрдайым салтанат құра берсін!
Игі тілекпен,
Теректі ауданының әкімі Арман Өтеғұлов
Биылғы 9 мамыр – Жеңіс күнінің қарсаңында «Орал өңірі» және «Приуралье» газеттерінен арамыздағы жеңімпаздардың өмір дерегін, қан майдандағы жанқиярлық ерлігі мен бейбіт күнгі жасампаз еңбегі жайлы оқи жүріңіздер. Газеттерімізге ардагерлер жайлы мақалалар мен құттықтаулар берулеріңізге болады.
zhaikpress
