Оралдағы қалалық білім беру бөлімі жанындағы мектептен тыс жұмыс орталығында түрлі үйірме жұмыс істейді. Ұл-қыздарымызға қосымша білім беріп, болашаққа жол сілтейтін мұндай үйірмелердің пайдасы көп. Жақында ел Тәуелсіздігінің 30 жылдығы және ұлттық валюта күніне орай «Жас тілші» және «Жас тележүргізушілер» үйірмелерінің балалары облыстық тарихи-өлкетану музейіне барып, таным көкжиегін кеңейтіп қайтты.
Ақ Жайық өңірінің өткен тарихымен, өркениетті мәдениетімен таныстыратын тарихи-өлкетану музейіндегі ұлттық валюта – теңге тақырыбындағы жәдігерлер оқушылардың ерекше қызығушылығын тудырды. Тәуелсіздік алған кездегі алғашқы қағаз және мәнеттік теңгелердің дизайны жайында музей қызметкері мол мағлұмат берді. Шәкірттердің ерекше ықыласы ауған жәдігерлердің бірі – «Жайық» қалашығынан табылған көне бұйымдар болды. Еліміз егемендік алғаннан бері өңірдегі ірі ғылыми жаңалық – көне қалашықтың ашылуы. Орал қаласынан 12 шақырым жерде орналасқан, XIII-XIV ғасырларда іргетасы қаланған Жайық қалашығының орнынан табылған нумизматиканың үлгілері, құрылыс, тұрмыстық заттар тарихи дәйек ретінде көрсетілді. Бұдан басқа балалар Тақсай ханшайымының тұтынған бұйымдарына ерекше қызығушылық танытты.
Гүлнәр Шәңгерей,
zhaikpress.kz
