Бар өмірін ауыл шаруашылығына арнаған кәсіпкерге орденді облыс орталығында өткен ел Тәуелсіздігінің 30 жылдығына арналған салтанатты шарада ҚР Парламенті Мәжілісінің төрағасы Нұрлан Нығматуллин табыс етті.
Абай Жанғалиев Бәйтерек ауданы Январцев ауылдық округіне қарасты Чинарев ауылында туып-өскен. 1975-1977 жылдары Қиыр Шығыста әскери борышын өтеп келген соң Батыс Қазақстан облысы ауыл шаруашылық институтының «Ауыл шаруашылығын механизациялау» факультетіне оқуға түседі. Кейін туған ауылына оралып, Приурал ауданы ауыл шаруашылығы бөлімінің бас инспекторы, Январцев ауылындағы «Вперед к коммунизму» атындағы колхоздың бас инженері қызметтерін атқарған.
Тәуелсіздігімізді енді алған қиын-қыстау жылдары шаруашылықтан қол үзбеген Абай Қуанышкерейұлы «Мирное» КСПХ басшысы қызметінде болған. 1999 жылы «Заман» жауапкершілігі шектеулі серіктестігін құрып, оны осы кезге дейін басқарып келеді.
Осы күні артынан ерген ұлдары шаруаға араласып, әке жолын жалғауда.
Туған ауылын түлетіп, қамбаны астыққа толтырған шаруа ауылдастарынан көмегін де аямайды. Ауылішілік жолды салуға, округ орталығына дене шынықтыру және сауықтыру кешенін тұрғызуға ниетті.
Түгелбай Бисен,
Бәйтерек ауданы
zhaikpress.kz
