Бүгін Алаш және Қайыржан Хасановтың өлкетану музейінде Қазақстан Республикасы Тәуелсіздігінің 30 жылдығына арналған «Тәуелсіздік – Ұлы Жаратқанның берген ұлы сыйы» атты рухани-танымдық шара өтті.
Айтулы шараны аудан әкімі Қадыржан Сүйеуғалиев алғысөзбен ашып, шараға қатысушыларды маңызды мереке - ел Тәуелсіздігінің 30 жылдығымен құттықтады.
Аудан басшысы Қадыржан Орынбасарұлы 30 жыл аясында елімізде қол жеткізілген жетістіктер мен ауданымызда атқарылған іргелі істерге тоқталып, аталмыш рухани-танымдық шараны ұйымдастырған «Ізгілік» қоғамдық бірлестігіне, шараға белсене қатысқан Қаратөбе колледжі мен жастармен жұмыс жөніндегі ресурстық орталығы ұжымдарына ризашылығын білдірді.
Шара барысында аудандық мешіттің бас имамы Әділжан Бекқазиев, көпті көрген ауыл ақсақалы Аманжан Әнесов, Желтоқсан оқиғасына қатысқан ауыл азаматы Ерболат Мақаш, Қаратөбе колледжінің директоры Мәулен Салахадден сөз сөйлеп, қазақ елінің басты байлығы мен құндылығы – Тәуелсіздік тарихы, еліміздің егемен ел болу жолында бастан өткерген қиындықтарды еңсеріп, қол жеткізген жетістіктері мен тарихи маңызға ие, тәуелсіздіктің бастауы болған Желтоқсан оқиғасы, дінге беріктік, отансүйгіштік, елжандылық турасында әңгіме өрбітті.
Аудандық мәдениет үйінің әншісі Мерей Амангельдиев пен Қаратөбе музыка мектебінің мұғалімдері Жарқын Байтеміров пен Қыдырнияз Егінғали ән шырқап, күмбірлете күй тартып сазды сәлем жолдаса, белгілі жас ақын Райымбек Өтепов «Арнау» орындап берді.
«Ізгілік» қоғамдық бірлестігінің төрағасы Әмірбек Жәнібеков жыл басынан бері діни, рухани, адамгершілік, қайырымдылық бағытындағы іс-шараларға белсене атсалысқан бір топ азамттар мен азаматшаларға аталмыш бірлестік атынан алғысхаттар мен сыйлықтар табыстады. Олардың қатарында Мәулен Аманшаұлы, Әділжан Төлебайұлы, Мерей Амангелдіұлы, Айдос Екпінұлы, Тоқтар Қуандықұлы, Гүлжан Мағзомқызы, Динара Қайырлықызы, Наурызбай Әбдіғалиұлы, Еркін Нұрлыбайұлы бар.
Басқосу соңында шараға қатысушылар естелік суретке түсті.
Ерболат Мырзағұлұлы,
Қаратөбе ауданы
zhaikpress.kz
