Қыс қызығы шаңғы теуіп, шанамен зырғанап, қар атысумен толатыны сөзсіз. Әсіресе, мұз үстінде коньки тебуге үлкен де, кіші де құмар. Бір жағынан бұл қызықты демалыс болса, екіншіден, денсаулық шынықтыру. Осы орайда, Теректі ауданының бірқатар ауылдарында мұз айдындары ашылды.
- Мұз алаңдары ауылда халық көп жиналатын жер. Сенбі-жексенбі күндері балаларын ілестірген ата-аналар келеді. Жастар кеште сырғанақ тебеді. Уақытты әрі пайдалы, әрі көңілді өткізуге болады. Ауа райы құбылып, жыламықтанған күндері Аңқаты, Покатиловтағы мұз айдындары сырғанауға жарамсыз болыпты. Енді ол алаңдарды қалпына келтіреміз деп отыр,-дейді «Теректі» спорт клубының әдіскері Өтеген Мүбарак.
Ал, ауданның білім беру мекемелері демалыс күндерін белсенді өткізуге шақырып, шаңғы спортымен шұғылдануға шақырды. «Шынықсаң шымыр боласын» деп ұрандатқан балалармен қоса ересектер де сенбілік белсенді демалысқа қатысты. Аудан орталығында жаңа тоған басына жиналған ересектер 3 км шаңғы тепсе, балалар шанамен зырғанады. Ұйымдастырушылар ыстық шәй таратып, көңілді демалыс күні өтті.
Енді, спорттық шаралар әр сенбі сайын жалғасын табады.
Балнұр Қуанышқызы,
Теректі ауданы
zhaikpress.kz
